4 Ağustos 2020 Salı 08:00

UNA ORASYON DE ALMA I DE KORASON

Forti BAROKAS Judeo-Espanyol 853 görüntüleme
8 Temmuz 2020 Çarşamba

Atras diez u kinze anyos, unas kuantas dammas tomavamos lisyones de Tora en el 6en etaj del batimento de el granrabinato en el Tünel. Tanto mos pasava ermozo el tiempo, ke empesimos a travar kon kuedra los diyas de martes despues del medyo diya.

Todas las dammas ke viniamos a tomar lisyon sin konosermos mos izimos amigas entimas, a la salida de la lisyon mos ivamos a la patiseri İNCİ a komer profiterol, kaminavamos fina Taksim, miravamos vitrinas i tornavamos a kaza alegres i kontentes.

Kada semana a su torno viniya un Rav a aklararmos. Todos los Raves ke viniyan eran muy savidos i veramente mos ambezaron munchas kozas ke no saviyamos. Ma kuando era le torno de el sinyor Rav İzak Haleva (dainda no era hahambashi) akeya lisyon era un teatro; en ambezandomos mos aziya riyir, en riyendo mos dava unos egzemplos maraviyozos.  

Un martes, era el torno de su eminensya Rav İzak Haleva. Entervalo de la lisyon mos demando una demanda muy muy enteresante… la demanda era:

“Ijas (mos yamava ijas) ande se aroga al Dyo, ande se orasyona de alma i de korason?”

 Por siguro todas mozos dimos la mezma repuesta. La orasyon de alma i de korason se aze en el kal kuando se avre el ehal akodesh, en Shabat, en moadim, en Kipur, la ora del shofar.

Es djusto", mos respondyo su eminensya, "ma la orasyon la mas de alma i de korason se aze en una ventana de un ospital”.

La verdad dizir es ke akeas oras kedi enkantada i no entendi muncho lo ke kijo dizir.

Atras 10 anyos, mi marido kayo hazino, la hazinura maldicha. 

Una demanyana kayo, se ezmayo, fuimos ovligados de yevarlo al ospital. Kuando lo tomaron para suanyarlo i azerle analizes, yo i mis ijos estavamos muy tristes. Despues ke lo yevaron, me fui a la ventana, miri a los sielos, me meti a arogar ke torne sin sar i sin mal.

Akea ora me vino al tino lo ke mos aviya dicho el sinyor Haleva i me kayo las lagrimas. Teniya muncha razon, esta orasyon no paresiya ni a las orasyones ke azemos en el kal ni a otras orasyones. Esta orasyon era veramente de alma i de korason.

Ma deve de ser ke el Todo Poderozo lo kijo mas muncho bien de mi. En komemorando el dyezen anyo, arogi ke su alma repoze en ganeden.

SYEMPRE KE ORASYONESH PARA BUENO!

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

gazete sayfası

Tünelin Ucu-İzel ROZENTAL

Tünelin Ucu-İzel ROZENTAL