7 Mart 2021 Pazar 13:26
vakko
vakko

La Korona d’Enverano

Silvyo OVADYA Judeo-Espanyol 2049 görüntüleme
22 Temmuz 2020 Çarşamba

En el Muzeo Djudio d’Estambol estamos realizando un proyekto de mas de 65 reportajes kon personas ke bivyeron en syertos kuarteres o sivdades ande no egziste mas una vida Djudia. Ya savemos ke ay munchas sivdades i kazales en Trakya komo Edirne, Tekirdağ, Çanakkale Ezine, Bayramiçi, Lapseki, Kırklareli, Çorlu, Lüleburgaz, Gelibolu, Uzunköprü, Babaeski, Silivri i en la rejyon de la mar Ege komo Urla, Kasaba, Tire, Milas, Bodrum, Fethiye, Bergama, Menemen, Foça, Bornova, Çeşme, Ödemiş, Bayındır, Söke, Nazilli, Kuşadası, Aydın, Manisa, Turgutlu i Akhisar... Ma vemos ke los Djudios un siglo antes bivyeron en todos estos lugares, formaron komunidades kon sus sinagogas, eskolas i ovras de bienfezensia. Oy en diya no es muy kolay de topar djudios ke bivyeron en estas sivdades o kazales. Oy en diya se topa en Urla syertas famiyas Djudias İzmirlis o mizmo de Estambol. Ma no biven komo Djudios de Urla. Observan el kasherut i merkan la karne kasher de Smyrna. Se van a la sinagoga en Alsancak o en Çeşme kon araba. Vos esto avlando de una famiya ke observa el Djudaismo. Ma no lavoran para una vida Djudia en Urla. Komo el transporto tyene munchas mas posibilidades, preferan ir a la sinagoga de İzmir. Ya se ke no es muy kasher, ma son las kondisyones del siglo 21.

  Komo la Korona mos limito mezes i mezes, para rekuperar este tyempo, fin de semana kon muestro amigo Alberto Modiano lavorimos para realizar 6 reportajes. Kada uno mas de una ora. Vos kero azer kreer ke fue un diya muy difisil para mozotros porke deviamos de segir todo modo de konversasyon sin pyedrer un byervo. I a la fin del diya estavamos muy kansados. Izimos 6 reportajes. El primer kon una damma de la Kula ke morava en Tünel; el segundo de Tekirdağ/ Rodosto ke eskapo la eskola primera en esta sivdad i ke tyene una memorya de oro. El segundo diya empesimos kon un Urfali nasido kresido en Estambol. Mizmo si se fue unas kuantas vezes a Urfa kuando era muy chiko, no era un halis Urfali ma konosiya la istoria de esta sivdad. Ya savesh ke la fin de esta komunidad fue achakes de un masakro trajiko ande syete almas fueron matados. Munchas personas no pudieron sintir mizmo esta tragedia. Despues, en dos o tres anyos todos los Djudios de esta sivdad vinyeron a Estambol o se fueron a Israel. Un ombre de Gaziantep ke mizmo oy en diya vende bestias para karne kasher, mos konto la vida ke bivyo en esta sivdad. Su padre era un merkader emportante i teniya bastantes relasyones kon los notavles de esta sivdad. Mos konto lo ke bivio mas de una ora i eskapo kon la seremoniya de la inaugurasyon de la Sinagoga. Una damma, ija del pediatro de Kırklareli mos konto munchas kozas enteresantes. Estava avlando un turko perfekto. Mos konto munchas kozas de su manseves. Ya savesh ke para mi la nosyon de manseves esta trokando kon mi edad. Las personas de mi edad estan mas mansevos. 

Eskapimos muestros reportajes kon un avokato Edirneli ke mos konto kreo todo sovre esta sivdad. Estuvo muy enteresante de ver personas ennamorados de la sivdad o del kazal ke nasyeron. Edirne i Gaziantep son dos sivdades ande los ke moraron en estas sivdades eran muy orozos i dainda tyenen un eskarinyo para eyas. No se de ke no egziste mas dingun Djudio (Ya se ke ay una famiya en Edirne) en estas dos sivdades.

  

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR