Kerer Bien

Esto es la estorya de la fuersa del amor... De mi papu i de mi nona.

Judeo-Espanyol
12 Ağustos 2020 Çarşamba

Hayim Behmuaras

 

Esto es la estorya de la fuersa del amor... De mi papu i de mi nona.

Ke este en Ganeden, mi padre me konto komo se kazo mi papu kon mi nona.

Mi papu Hayim, ke este en Ganeden, era d'Anderne; antes a los Edirnelis les diziyan d'Anderne... Era famiya de Behmoaras; era buena famiya en Edirne, i eran entelijente... Ma mi papu no meldo muncho porke en su tyempo no aviya eskolas komo oy, eran muy pokas i eran eskolas de ley. Mi papu no kijo meldar i por esto empeso a lavorar allado de un sobadji... El padre de mi nona al tiempo era riko i saviya ley, era muy sofu... Mi papu ni saviya dizir AMEN.

Ma kon mi nona se keriyan muncho bien i keriyan kazarsen.

El padre de mi nona no keriya un yerno komo el (komo mi papu), keriya un yerno ke sepa la ley i ke sepa meldar. Por esto no estava akseptando este kazamyento.

Mi nono kuando oyo esto se fue allado de un amigo ke eran muy entimos. El padre era Haham de famiya Sarfati. La famiya Sarfati era muy importante para Edirne porke los Grand Rabinos eran de Sarfati...

Le disho al amigo: tu padre me puede ambezar a meldar Kidush? Solo Kidush?

El amigo se lo konto a su padre el kavzo todo, i el padre lo aksepto. Mi nono Hayim tres mezes, kadal diya tomo leson i se ambezo a meldar el kidush una maraviya...

Mi padre diziya ke teniya la boz ermoza.

Una noche de Shabat, en la mano kon una kupa de vino se fue delantre de la puerta de mi nona, i empeso a meldar el Kidush kon la boz ermoza.

Kuando lo oyo el padre de mi nona, vino delantre de la ventana i miro ke Hayim esta meldando Kidush. Le plazyo.

Mi papu tres noches de Shabat izo lo mizmo, vino al a puerta i empeso a meldar Kidush.......

A la  Fin: El padre de mi nona miro ke Haymachi la kere bien i por esto empeso a ambezarse la ley i empeso a meldar el Kidush, le dişo ke este en Ganeden a mi nona Sara: dizele ke vengan a demandarte...

 

Karas vemos, Korasones no savemos

Korason alegre, nunka se enviejese.. 

 

 

Siz de yorumunuzu yapın

Tüm Yorumları Görün