3 Mart 2021 Çarşamba 15:32
vakko
vakko

I ESTO TENIYAMOS DE VER

Forti BAROKAS Judeo-Espanyol 1334 görüntüleme
19 Ağustos 2020 Çarşamba

En pasadas mi kerida amiga Şeli Gaon eskrivyo un artikolo enriva de la dejenerasyon de los meldados ke se estan azyendo en el Zoom. Eya entro al zoom para azer onor a los aveles i se maraviyo de ver ken kon atlet, ken komyendo pipitas i ken espandido avlando kon telefon.

Ya es verda kon esta maldicha korona ke troko todo ma malorozamente el deskomporto no troko. El otro diya sali de kaza para irme a la mar. Este anyo en Anadolu Kulubü ay un kontrol alavado. Por egzemplo, a la entrada de la puerta, metyeron personel espesyal para mizurar la kayentura. Todos los ke entran estan mizurados kon grado dijital i ansina estan pasando del turnike. Por la distansya sosyal, no va dizir la mizma koza. En la plaj, metyeron una mujer kargada de asigurar ke mos asentemos kon distansya ma povereta ya se ezvanesyo de dizir, "no pasesh el sinyo amariyo", si ay ken la oyga!

Kurto despues ke me mizuraron la kayentura, ya pasi del turnike, vide un grupo de dammas lo mas konosidas en la guerta. De uzo lo mas de diyas munchas mujeres aresiven musafires, komen en el restoran, selebran aniversaryos. Las saludi i abashi a la plaj. Despues de unos kuantos minutos a una de eyas ke es en mizmo tyempo mi amiga, le demandi:

"Ariva aniversaryo ay u vijita? Si estavas envitada deke abashates a la plaj?"

"No ay ni aniversaryo ni vijita", me respondyo, "es kondoleensya ke izimos".

 I kontinuo a kontarme. "De tala amiga se le muryo la madre, no mos pudimos ir al funeray siguro i komo mora muy leshos la envitimos a la guerta del klob para dizirle “mas por dingunos no”! Agora se la yevaron a la eskala a komer pishkado, yo no kije, esta muncha kalor, abashi a la mar.

Veramente no topi ke pensar. No es por akuzar; kada uno lo ke kere aze, ma kondoleensya en la guerta de el klob? I esto teniyamos de ver!

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR