Las Kreaturas de la Koloniya de Vakansas de Burgazada

L´homme propose et Dieu dispose (El ombre propoza i el Dio dispoza).

Esti SAUL Judeo-Espanyol
26 Ağustos 2020 Çarşamba

Mi program era el arte del siglo 20. 

Ambezarles el Collage (kolaj), ke es un braso de la pintura...

El buto es de formar una kompozision kreativa, estetika i sorprendente.

Me avian propozado, antes anyos, de ensenyar el arte a un grupo de mansevos. Me meti a bushkar una novedad, un tema ke los iva englenear i interesar i un poko AMBEZAR.

Desidi de avlar del Collage kreado en Fransia despues del Kubismo, ke empeso kon Pablo Picasso i kontinuo kon Marcel Duchamps.

Tomo su nombre de “papier collé” (papel apegado) ke es muy adekuado.

Materiales ke se akordan o no, se kompozan de diferentes modos, komo le gusta al artisto: Papel mural, gazetas, kutis, fotos, ets. 

Siguro ke desenes kon pasteles o akuarelas se adjustan tambien.

Apareji i distribui a kada uno una grande anvelop konteniendo las fotokopiyas de ovras de grandes pintores, ojas de magazines, kola para apegar, kreyones, tijeras.

Una vez el sujeto era la natura muerta, otra vez el Dia de la Madre...

Me enkantava de ver sus ovras i por agradeserlos, les prometiya i realizava una ekspozision o en el Klub de Burgazada, o en la galeriya de Fakirleri Koruma Derneği.

 

No me olvido las sensasiones agradavles, sus palavras yenas de agradesimiento i de kontentes en la avyertura de las ekspozisiones.

Esperamos de estar djuntos para gozar del arte.

Siz de yorumunuzu yapın

Tüm Yorumları Görün