26 Ekim 2020 Pazartesi 16:26

Los Djudios en Pakistan

En los ultimos anyos, el nombre de Pakistan esta aparesyendo en kada nada en las novelas de la Televison i en la prensa kon una frekuensia engrandesyendo. I kaji en todas las novelas se trata de viyolensa, pletos, sangre i gerra. El Pakistan es en realidad un paiz muy djoven: se kreyo kuando se separo de la India el 14 de Agosto de 1946.

Metin DELEVİ Judeo-Espanyol 3939 görüntüleme
26 Ağustos 2020 Çarşamba

 

En el tyempo de la kreasyon de Pakistan, aviya aproksimadamente 2000 (los shifros trokan entre 1500 i 2500 depende del manadero) djudios bivyendo en el pais, la mayoría en la sivdad de Karachi. Estos djudios, en su mayor parte, vinyeron de la India i eran myembros de la komunidad Bene Israel.

En dos byervos, ken son los Bene Israel?

Los Bene Israel ("Ijos de Israel", tambyen ke se konosen komo la kasta "Shanivar Teli" (kasta de los "Prensadores de Azete en Shabat" o "Kasta Djudia Nativa") es una komunidad de djudios en la India. Se dize ke esta povlasyon se formo por los desendyentes de una de las Tribus Perdidas i ke se instalaron en estas tyerras munchos siglos antes. En el siglo XIX, despues ke salyo en medyo la nosyon del djudaismo normativo (ashkenazi / sefaradi), esta povlasyon empeso a emigrar de los kazales de la area de Konkan verso las sivdades serkanas, prensipalmente verso Mumbai, (antes se yamava Bombay) ma tambyen verso Pune, Ahmedabad en la India i Karachi, en Pakistan aktual. Munchos entre eyos toparon pozisyones kon la otoridad kolonial britanika de la epoka. En el empesijo del siglo XX, munchos Bene Israel fueron aktivos i izyeron una “renome” en la mueva endustriya sinematografika, komo aktrisas i aktores, produktores i direktores. 

Si tornamos a muestro sujeto, a Pakistan, malgrado ke Pakistan era i es un pais kaji kompletamente musulman i teniya una sola sinagoga, Magain Shalome, konstruizido en 1893, los djudios de Karachi reusheron a formar sus komunidad durante la primera mitad del siglo XX. Se fundyo una Asosyasyon Djudia de Jovenes i aviya un fondo spesyal, el Fondo de Ayudo Karachi Bene Israel, para apoyar a los judíos proves. La komunidad djudia fue byen akseptado en la sivdad de Karachi. La prova es ke Abraham Reuben se izo uno de los konsejeros de la Korporasyon de la Sivdad de Karachi (Karachi City Corporation) en 1936.

La vida de los judíos de Pakistán empeso a trokar i afilu a deteryorarse poko despues kuando deklaro su endependensya i ke Israel tambyen deklaro su endependensya. En 1948, los opozantes de Israel i los radikales pakistanezos, atakaron la Sinagoga. I esto fue el empesijo de la fin de la vida djudia en Pakistan. Munchos de los djudios pakistanezos empesaron a abandonar el pais: se fueron, en primero a Bombay i de aya a Israel, Kanada i a la Ingleterra. Una viyolensiya similar se repeto durante kada una de las gerras de Israel, i los djudios de Pakistan kontinuaron a fuirsen. Los ke kedaron, manko de vente, se eskondyeron entre la povlasyon.

El 17 de julio de 1988, la sinagoga Magain Shalome fue destruida por orden presidensyal para ke se pueda fraguar un sentro komersyal en el sityo. El simeteryo djudio kedo i es mantenido por non djudios lokales.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR