אמא יודעת הכל!
Ima save todo!
Eden Israel
No ay en el mundo amor komo el amor de Ima i no ay en el mundo merikiya komo la merikiya de Ima. Me vaya kapara por ti!
Kuando penso en mi Ima Rahel yo me akodro de la “Supa del Rabino.”
Komer bien syempre fue una prioridad en mi kaza. Los konosimyentos i la preparasion de los alimentos se yevan de una jenerasyon a otra. En mi chikez, yo me akodro ke munchas vezes la kozina era el lugar donde mi famiya avlava de las kozas de muestro diya i ande mi madre eskrivia nuevas reseftas en el tefter de reseftas. La mayoria de estas reseftas eran tradisionalas dezvelopadas durante muncho tyempo, kon rituales i kostumbres de Kashrut.
Las karnes no se deven komer al mismo tyempo ke los produktos de leche. No se puede komer karne de puerko en kualkera de las formas. El Kashrut es la parte de los preseptos del djudaizmo la kuala trata de lo ke los djudios pueden i no pueden komer, bazado en los preseptos de muestra Tora i tradisiones djudias enterpretadas i ekspandidas a lo largo de los syeklos.
La kozina es el lugar ande la kultura de un puevlo es revelada. Egziste un arte kulinario diferente en kada puevlo, kultura i rejion. La emportansya de muestras famiyas, muestras kulturas i tradisiones es muy grande. Komo puedes pasar Pesah sin Supa de Poyo? Shabat o Rosh Ashana sin Supa de Poyo no es posivle!
La Supa de Poyo es un plato tradisional ke djudios de todo el mundo konosen, desde las komunitas sefaradis asta las komunitas ashkenazis, todos tyenen sus proprias reseftas i komparten tradisiones.
La Supa de Poyo es el plato ande se representa mi orijin la kuala mi Ima aze muy bien. “La Supa de Poyo puede melizinar todo!” Para mi madre, kuando yo o mi ermana teniyamos una hazinura, el mejor medikamento syempre era la “Supa del Rabino.”
Porke “Supa del Rabino?”
Kuando era chika mi madre syempre avlava de la emportansya de los alimentos para muestra salud i asta oy en dia kuando esto hazina, un plato de Supa de Poyo kaynte kon muncho savor i amor aze parte de mi vida.
En mi famiya, mozotras yamamos la Supa de Poyo, la “Supa del Rabino.” Una referensya a Rambam.
Moshe ben Maimon, konosido komo Maimonides, nasio en Kordova, Sefarad. Rambam fue el rabino, mediko i filozofo djudio el mas famozo de la Edad Media.
Una de sus dichas es “Aga de sus alimentos sus medikamentos i no sus medikamentos sus alimentos.”
La Supa de Poyo fue konsiderada un alimento “kurativo” a lo largo de los syeklos, ma fue el Rabino Maimonides ke kon su livro “Sovre la kavza de los semptomas” transmitio esta saviduria de jenerasyon en jenerasyon.
Mersi muncho Ima!
