Pensamyentos desde el Atlantiko

Kenan CRUZ Judeo-Espanyol
9 Eylül 2020 Çarşamba

Keridos meldadores, en mis mezes aki en Portugal pasi munchos diyas i tadres al lado del oseano Atlantiko. Dezde mi chikez siempre tuve una sensasyon espesyal kuando me kedo en las plajes o en los pontes ke tienen vista de la kosta Atlantika. Esta sensasyon tiene dos dimensyones bastantes distinktas. La primera dimensyon es la ermozura natural. Komo la vista de gayvotas bolando, el ruido de las ondas, la golor de las aguas, i la sensasyon de kaminar en las arenas. Ademas, kuando mirash al oseano verash de vedra un espasio enorme, ande kada benadam se siente komo simplemente una parte chikitiko de un mundo tan grande. Esta primera dimensyon es en kurto todo lo ke puedemos sentir kon muestros proprios sentidos, muestros ojos, muestras narizes, muestras manos, i muestros oyidos.

La segunda dimensyon es una kompletamente diferente. Es la dimensyon abstrakta, ke mozos komo umanos damos al oseano. Una karakteristika del benadam es presizamente esto, ke mozos damos muevos sinyifikados a objektos en relasyon kon muestras ekspriyensyas i emosyones. En este sentido, lugares jeografikos en todo el mundo tienen sinyifikados kulturales, emosyonales, relijiyozos, o sosyales. Komo kualker otro punto jeografiko en el mundo, el oseano Atlantiko tambien tiene un alay de sinyifikados abstraktos bazados en la istorya umana i en las ekspriyensyas de diversos grupos. Por egzemplo, por munchas personas de orijin afrikana, el oseano tiene un sinyifikado muy profundo ke reflekta la istorya difisil i triste del esklavaje. Komo milyones de afrikanos fueron transportados desde Afrika a las Amerikas atraves del grande oseano Atlantiko, es kaji imposivle no pensar sovre esta istorya trajika i esta memorya kolektiva kuando pensash en el Atlantiko.

Un otro sinyifikado ke tiene el Atlantiko, es lo de la memoriya kolektiva djudia. Desde la kosta Atlantika de Portugal, munchos djudios partieron asta las Amerikas en bushkidad de refujyo durante los siglos. En el tiempo de la engizisyon, munchos djudios i kristyanos muevos fueron desde Portugal asta Brazil o las izlas Karayibes, ande toparon una sensasyon de seguridad komparado kon la situasyon en la Evropa. Tambien durante los anyos de la segunda gerra mundial kuando Portugal se kedo neutral, munchos djudios pasaron por el payis en el kamino asta las Amerikas. Durante esos anyos, refujiados djudios de todas partes de la Evropa se establesieron temporaramente en las sivdades i kazales de la kosta Atlantika de Portugal. Yo intento imajinar tambien, kualo fue el sentido ke el Atlantiko dyo a todos estos refujiados ke estavan en bushkidad de azilyo, seguridad, i salvasyon? I kualo es el sinyifikado ke el oseano kontinua a tener por los desendientes de todos los grupos ke fueron impaktados por el Atlantiko durante la istorya? Aki vos desho kon esta demanda, sanos i rezyos ke estesh!

 

 

Siz de yorumunuzu yapın

Tüm Yorumları Görün