D E V E

Eliz GATENYO Judeo-Espanyol
16 Eylül 2020 Çarşamba

Teniyamos un vizino ke lavorava en una botika en Tahtakale. Los patrones suyos eran 3 ermanos judios. Eran haveres. La botika era estrecha i larga. Los ermanos se asentavan kon sira.

Al lado la puerta se asentava el un ermano ke konosiya a todos los kliyentes. Unos kuantos pasos mas despues de el se asentava el sigundo ermano, ke se okupava de los kuentos i mas despues estava el treser ermano, ke se okupava de la vendida.

Los kliyentes eran lo mas de Anatolia. Kuando entrava el kliyente de la puerta, se alevantava el primer ermano de su lugar i lo aresiviya en mensionando su nombre, i le diziya "hoş geldin", le demandava komo esta. Avlavan de aki de aya unos kuantos puntos… 

El sigundo ermano ya oyiya el nombre ke mensyono su ermano ke estava asentado al lado la puerta. Mirava pishin en sus tefteres (porke akel tiempo no aviya komputadores), topava la oja de este kliente i mirava si teniya devda o no. I si teniya muncha devda, le dava haber al treser ermano ke se topava mas aryentro. La diziya “deve”. Keriya dizir ke este kliente les deve muncho. En tomando este haber, el treser ermano se akavidava en la vendida. O le diziya ke no kedo mas, o le diziya ke ya eskapo este artikolo. No lo endevdavan mas muncho. 

Esto afitava kon kada kliente. Eran klientes de anyos.

Un diya de muevo vino un kliente a la botika. De muevo la mizmo seremoniya. "OOOOOO hoşgeldiniz Fulano bey. Komo estash?" Ampesaron a azer sohbet. El kliente no estava muy repozado. A la fin le disho al parton. Mira, mas no va vinir a esta botika porke me esto aravyando kon este ermano tuyo. Se enkanto el primer ermano, le disho: Deke? Ke afito? Ke te izo mi ermano? Alora le disho el kliente. Kada vez ke vengo yo aki, me yama DEVE. (Deve es gameyo en turko). Una vez le va dar un punyo i le va romper los dientes.

No supo kualo responder el patron. Ni le pudo eksplikar la razon de este komporto. Ma de akel diya en delantre  desharon de aplikar este sistem. 

Siz de yorumunuzu yapın

Tüm Yorumları Görün