24 Ekim 2020 Cumartesi 20:04

El Baron de Rotschild en la Sinagoga de Haydarpasha el diya de Kipur

Dora NİYEGO Judeo-Espanyol 1314 görüntüleme
23 Eylül 2020 Çarşamba

(Tomado del livro "Haydarpaşa’da Geçen Yüzyılımız")

El 28 Elul 5659 (1899) tuvo lugar la seremoniya del estrenyamyento de la Sinagoga de Haydarpasha kon el nombre Hemdat Israel. El Ambasador de los Estados Unidos en el Imperyo Otomano, Oscar Strauss asistyo a esta seremoniya.

El Grande Rabino Moshe Ha-Levi avryo el Ehal Akodesh. Sigiente, uvo tres diskorsos. El primer diskorso en turko por el Kolonel Viktor Galimidi, el sigundo en judeo-espanyol por Ribi Avraam Danon, i el treser por Ribi Hayim Nahum.

La fyesta de Yom Kipur del mezmo anyo fue selebrada en esta mueva Sinagoga kon la prezensya del Baron Rotschild ke por shans se estava topando en Estambol, en azyendo un viyaje de plazer en su yacht.

El Baron Edmond  de Rotschild ekspreso su dezeyo de asistir a la seremoniya de Yom Kipur en la mueva Sinagoga. Ma malorozamente el Baron Edmond de Rotschild ke aviya tanto dezeyado a asistir a la seremoniya, no pudo vinir porke estava dezrepozado. Solo su ijo i su sovrino asistyeron a la seremoniya. 

Los asistentes de la Sinagoga de Haydarpasha kon grande alegriya resivyeron el Baron Binyamin de Rotschild (ijo del Baron Edmond de Rotschild) i su primo Rudolf Goldsmidt. Tambien el Ambasador Oscar Strauss, su mujer, su ija i su kunyada asistyeron a la seremoniya de Yom Kipur.

La demanyana de Yom Kipur, los reprezantantes de la komunidad de Haydarpasha, el Prezidente de las Eskolas Alliance Israelite, Monsieur Fernandez, akompanyados por los delegados de la polisiya, se fueron al puerto para resivir los envitados. 

Akel diya, la mueva Sinagoga fue adornada kon rozas i tapetes presyozos. Los envitados fueron resividos kon el imno BARUH ABA (Bienvenida).

Ribi Hayim Nahum, direktor ayudante del Seminaryo Rabiniko, izo un deskorso en fransez. Los administratores de la Sinagoga dyeron la onor de yevar las Sefer Toras al mansevo Baron de Rotschild i a su primo Goldsmidt.

Sigiente, los envitados fueron yamados a la lektura de la Torah. El Baron i su primo izyeron grandes donos a las institusyones de Haydarpasha. El Baron ke era atado al judaizmo, ekspreso su grande plazer de pasar el diya de Kipur en la Sinagoga de Haydarpasha, i disho ke el edifisyo fue konstruido kon grande gusto i admiró el orden perfekto de la seremoniya. El Baron fue muy estimado i konsiderado kon respekto i simpatiya por los asistentes.

El Baron i su primo ekspresaron sus rengrasyamyentos i manifestaron una grande afabilidad enverso todos los ke tuvyeron la onor de aserkarsen de eyos.

Este evenemyento nunka fue olvidado por los abitantes de Haydarpasha i fue guadrado komo un rekuerdo presyozo.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR