Esperansa

La ora ke la oruga (tırtıl) penso ke ya le vino la fin se konvertyo en mariposa No serres el livro inmedyatamente, la esperansa puede estar en la pajina sigyente Si las nuves estan en el syelo no peryas la esperansa ke despues va briyar el sol

Forti BAROKAS Judeo-Espanyol
23 Eylül 2020 Çarşamba

Keridos lektores, estas palavras las meldi en un livro kontenido de esperansa. Pensi ke en estos diyas todos mozotros estamos asperando la fin de esta maldicha korona ke mos empresyono la vida. Tenemos esperansa ke en el anyo muevo 5781 (para mozos 2020 ya eskapo), vaya i no venga, todo lo negro va kedar aya i lo vamos a kontar en bueno. Yo kreyo ke kon la mitzva del shofar i kon la orasyon kolektiva ke vamos azer diya de Kipur, se van afirmar todas las orasyones i las esperansas.

Kuando muncho eskurese es para amaneser.
Entraremos al  diya de Kipur kon moral, kon esperansa i en riyendo kon una anekdot.

UN CHIKO PEKADO

Un mansevo vyene a la kaza de un rabino i le dize:

---Sinyor haham, yo ize un pekado, kualo puedo azer para pardonarme?

El rabino le demanda:

--- Komo de pekado?

--- No me lavi las manos antes de komer.

--- Si… pekates ma es pardonado si no lo azes otruna vez. Kreyo ke no te olvidates de dizir la beraha de antes de komer?

--- No, sinyor haham no dishe porke aviya en el entorno otra djente ke no eran djudyos i me averguensi de dizirla.

--- Kualooooo? Komites en un restorante ke no era kasher? Komites trefa?

--- Si, sinyor haham komi trefa!

--- Deke? No esto entendyedo en esta sivdad ay miles de restorantes kasher!!! 

--- Todos los restorantes kasher estavan serrados. 

--- Todos? Komo puede ser?

--- Estavan serrados porke era diya de Kipur!

HATIMA TOVA.

 

 

Siz de yorumunuzu yapın

Tüm Yorumları Görün