24 Ekim 2020 Cumartesi 19:59

Viajar en los diyas de korona

Kenan CRUZ Judeo-Espanyol 959 görüntüleme
23 Eylül 2020 Çarşamba

Algunos diyas atras fue la primera vez ke viaji en aviyon desde el empesijo de la pandemia de COVID-19. La mas grande koza ke vide es ke el konsepto de viajar se troko kompletamente. En un solo diya pasi por tres aeropuertos, porke tuve ke azer una eskala larga en la Almanya, i reelmente vide ke todos estan yenos de espanto. Dingunos no kere asentarse al lado de dingun otro. Mizmo aryentro del aviyon, todos se miran unos a los otros kon sospecha i espanto. La koza ke me izo mas nervioso fue ke muncha djente dainda na save (o no kere) uzar sus maskas korrektamente. Mizmo ke es nesesaryo tener la maska durante el vuelo entero, muncha djente mete sus nariz afuera o afilu kita la maska kuando las hosteses no estan mirando. Por mi, esto es un komportamiento muy infantil i sinyifika una falta de respekto para todos los otros viajantes. Tambien imajino ke las hosteses desmazaladas se deven kansar dopio en estos diyas de kriza sanitaria. I kale ke los viajantes tambien pensen un poko sovre eyos, i ke agan todo para ayudarlos i azer sus diya un pokitiko mas kolay.

Komo ya imajinash, en los aeropuertos ay dezenfektantes en todo lado, i tambien tenesh ke uzar la maska siempre. Yo tuve un pensamiento kuando estuve en este viaje ke esto todo no se va trokar despues de la pandemia. Mozotros vamos estar tan akostumbrados ke algunos kostumbres ke siempre teniyamos, komo por egzemplo apretar las manos kuando konosesh alguno muevo, dar bezikos a tus amigos, o tener bufes avyertos en restoranes o oteles no van tornar de muevo. Tambien tengo estas dudas sovre la edukasyon i el lavoro de distansya. Por munchos, lavorar dezde kaza es muy difisil porke no tienes la opsyon de separar tu vida profesional de tu vida personal, i esto puede kavzar munchos problemas. Ama por las empresas grandes ke pensan mas en paras ke en el bienestar de los lavorantes, no tener ofisinas i no tener todos los gastes de agua, elektrisidad, ets. de edifisyos grandes es una manera de ekonomizar paras. Entonses kreyo ke munchas empresas van a kontinuar a tener sus lavorantes en distansya mizmo despues de la pandemia, i seguro ke esto va tener konsekuensias sosyales enormes. Lo ke es djusto es ke los sosyologos reelmente van a tener muncho lavoro kon todos estos trokamientos ke estan afitando en el mundo! Esperamos ke la anyada mueva sea mas trankila i luzya. Shana tova u’metukah a todos vozos! Ke el anyo muevo vos trayga salud, felisidad, i aftaha.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR