Yossi Yusuf Pinhas
En meldados i en fiestas dizimos “para kada anyo”, ke mos veremos de muevo al anyo vinyendo.
Semos kriansas sosyales: no puedemos estar solos muncho tiempo. Estamos auzados a dizir “buen diya” a los lavorantes del market, bever un kaviko kon la vizina, dar un torno i ver konosidos, saludarlos, azer un pokitiko de dedikodu: ambezar ke paso kon la ermuera de esta, kon ken kazo el inyeto de este. I semos kriansas tokaderas: una karesa en el ombro, un abrazo, tomar de mano, dos bezos… Si no tokamos, mos yaman “ayde deshalo, es yelado.” Muestra relijiyon es sosyal: las orasyones deven tener “minyan”, las kriyaturas ambezan la Tora i meldar endjuntos. Es tradisyon de komer endjuntos en muedes komo Rosh Ashana i Pesah, no puede ser otro modo, o no?
Este anyo ya vimos el otro modo. El maldicho virus Corona mos troko las vidas kompletamente.
Es un poko temprano de yamar 2020 un malanyo ama akseptaremos ke no esta pasando muy bien. En enero ya aviya fuegos en Australya, seles en Endonezya, volkanes en los Filipinos. En febrero ya aviya gerras i muertes en el mundo entero, seles i rashes en Van. En marso, uvo rashes en Puerto Rico i todo el mundo se serro achakes de la Corona virus. En mayo i junio, aviya inyeve vedre en Antartika, i langostas komyeron kampos en Afrika i India (ken no penso las firidas ke trusho el Santo Bendicho enriva de los Ejipsiyanos?) En septiembre se patladeo (eksplozyo) el porto de Beirut, se kemaron los arvoles en Kaliforniya.
No eskapo la desgrasya de miles ke fueron de sus tierras: de Rohingya a Yemen, de Siria a Sudan, se refujyeron miles de personas.
Los ke mos afito kon el Corona virus en marso i despues, mos afekto tanto ke no lo vamos a olvidar nunka. De Turkiya al Portugal, de Israel a Japonya los governos i savidos disheron ke “kedemos en kaza.” Od a-yom estamos metyendo maskas, lo ke parese ke siempre estavamos kon maskas, estamos auzados! Yo no tomi en mis brasos a mi madre, ya ay 6 mezes. El espanto, oyir haberes, entender komo el Virus se lavora, la insertitud, la ansya i la ansiyedad…
No lo vamos a olvidar komo fue Pesah i komo meldimos la Agada. Mozos estuvimos kon el telefon savido vyendo a mis primos en Israel, kon un otro telefon (no savido) yamimos a mi madre ke estuvo oyendo todo. Estuvimos solikos ama djuntos. Komo dize en el empesijo de la Agada: todos endjuntos! I en la eskapadura mos dishimos, “para kada anyo,” porke estamos bivos i sanos.
Antes unos kuantos anyos vide un filmo ke se yama “Another World / Un otro mundo”. En el filmo, en supito al lado de la luna se aparese un otro mundo mismo komo el muestro. La djente miravan a este otro mundo i pensavan komo pudiya ser la vida aya. Komo un otro mundo, puedemos dizir ke esta pandemia mos diyo la okazyon de mirar a muestras vidas de leshos: komo estavamos azyendo las kozas antes: bivir en la kaza, komo avlavamos, komo no yamavamos muestras paryentes, los ke biven leshos. Entre Rosh Ashana i Kipur miramos al anyo pasado: ke vimos, ke dishimos, ke izimos, kon ken mos keshimos, a ken ofendimos. I kuando orasyonamos, miramos a la anyada vinyente komo es un otro mundo, kon sonrizas i yena de esperansa, ande bive una mijor versiyon de mozotros, no manchada, blanka.
En su mensaje por Rosh Hashana, Rav Mendy Chitrik, el Rabino de la komunidad Ashkenazi d’Estambol, dize ke la esensya de Rosh Ashana es ke el Mundo esta enkolgado en la voluntad del Dyo i ke muestras orasyones, no importa komo oy i el prezente esta, son para ke mos sonriye el futuro, sierto ke el Dyo mos va oyir.
Shana tova, anyada buena, i para kada anyo!
