Artikolo del sitio ofisial de la Sivdad de Tomar: www.cm-tomar.pt
Traduksyon de: Eden Israel
La Esnoga de Tomar es el uniko templo ebreo proto-renasimiento existente en Portugal. El plan kuadrangular i el techo en domos a baze de kolumnas i mensulas en las paredes prezentan influensas oryentales.
Fue konstruida en el siglo XV i serrada en 1496, kuando los djudios fueron ekspulsados de Portugal, despues fue konvertida en prision. En el siglo XVII se konose komo Ermida de San Bartolome, en el siglo XIX fue granero, bakkal i depo.
Solo en el anyo 1921 uvo la posibilidad de rekuperar la dinyidad pedrida, kuando fue klasifikada komo Monumento Nasional por Samuel Schwarz, djudio polako investigador de la Kultura Djudia, ke la salvo del estado kaotiko en el ke estava, la adkirio en 1923 i la dono en 1939 al Estado Portugez para azer el Muzeo Djudeo-Portugez de Avraham Zakuto.
En las ekskavasyones arkeolojikas ke izyeron en 1985, deskuvrieron estrukturas de kayentamiento de agua i vinches, lo ke demuestra la egzistensya de una Mikve para el banyo ritual de los djudios.
En la Edad Media, komo otros komersyantes, tambyen los djudios viajan por el paiz, donde sus pasos en Tomar no pasarian desapersividos para el Infante D. Henrique, ke stimulo su fiksasion por la Kaleja de la Juderia (mas tadre Kaleja Mueva i oy en diya Kaleja Joaquin Jacinto.)
Es probavle ke uviera puertas en los ekstremos al oeste i al este de esta kaye, en la interseksion kon las kayes Molinos i Derecha, respektivamente, ke estarian serradas por la noche. La referensya la mas antigua a esta komunita se remonta al 1315, siendo muy importante su kontribusyon al kresimiento de Tomar en los siglos XIV, XV i XVI.
Simbolo de la Esnoga
En las paredes de la esnoga, las dodje kornichas sinyifikan las Dodje Tribus de Israel. Las kuatro kolumnas reprezentan las kuatro matriarkas: Sara, Rivka, Lea i Rahel, las ultimas las ijas buchukas de Laban. Es por esto ke los kapiteles dekorados kon motivos vejetales se enkontran en dos kolumnas i son diferentes del resto.
