La Amistad

Judeo-Espanyol
30 Eylül 2020 Çarşamba

Hayim Behmoaras

Jackie kon Mark eran dos amigos muy entimos. Estavan meldando en la mizma klasa; kuando eskapava la eskola viniyan a kaza endjuntos porke moravan lado kon lado. Aziyan las lesones endjuntos, endjuntos kaminavan i djugavan.

Jackie teniya ermosa boz i Mark saviya tanyer gitara. Kuando viniyan lado kon lado les plaziya kantar. Johnny Guitar era sus kantika ... Un diya de alhad estavan djugando en la kasa de Jackie. En supito Jackie rompyo un vaso ke era muy valoroso, era antika. El padre kuando oyo el ruido, vino a la kamareta i kedo entontesido. Mark se aserko de el i le disho, "Perdoname, yo lo ize ma no kije romperlo, fue sin kerer" ... Este djesto le plazyo muncho a Jackie...

Paso anyos, la eskola se eskapo i se izyeron grandes, la vida los espartyo a los amigos entimos, i kada uno se fue a su kamino... Jackie en New York avyo un ermozo Restaurante ke se izo muy famozo. Ma  malorozamente Mark no pudo parvinir tanto, se izo tanyedor de las kayes. Un diya Jackie, kaminando en la kaye, oyo una kantika konosida, se areto i miro enfrente. Vido un ombre estava kantando Johnny Guitar, se metyo los antojos de sol, i el chapeo lo abasho un poko, i paso enfrente. Lo konosyo ke era Mark porke en la naris teniya un beniziko. No le avlo nada, kito de la aldikera una kartvizit i lo desho aryento del chapeyo ke estava delantre de Mark. I despues se alesho de aya. Mark no entendio nada, miro a la kartvizit. Estava eskrivyendo, "Restaurante Exlusive, Franklin street".

Se penso, se penso i a la demanyana se fue al restaurante. Entro aryento, lo resivyo el direktor i le disho, "Ke keres?"porke ya saviya la konsejika. Jakie le aviya kontado al direktor. I Mark le konto lo ke paso, i el direktor le disho, "Para midi i para la noche por los musafires keremos ke tanye uno kon la gitara; si akseptas amanyana empesa a lavorar aki." Mark en supito se emosyono ke topo un echo, las ansiyas se ivan a eskapar, iva ganar paras. I kedaron dakordo. Al otro diya empeso a lavorar. Ma estava merrikiyozo ke dainda no lo aviya konosido al parton. Ken era? Los diyas estavanpasando, Mark estava muy orozo, muy kontente i los musafires tambien. Un midi entro Jackie de la puerta, i se asento en una meza i lo saludo kon la mano a Mark. Mark se emosyono kuando la vido despues de tantos anyos. La teniya a laamiga entima enfrente. Eskapo el program i vino al lado de la meza. Se abrasaron, se bezaron i avlaron oras enteras. Jackie le konto ke aki viene muncho; le plaze las komidas. Le konto del marido, de los ijos. Nunka no le disho ke el restaurante era suyo  porke no keriya romperle el korason. Despues de akel diya Jakie kon Mark anyos i anyos estuvyeron  endjuntos, komo antes komo eran kriyaturas. I Mark no lo supo nunka ke Jackie era su patron.

 

La Amistad tura toda la vida kuando es de  korason i de alma!

 

Siz de yorumunuzu yapın

Tüm Yorumları Görün