20 Ekim 2021 Çarşamba 18:54
Op Dr Mücteba Gündüz

El primer “Sir” Djudio

Metin DELEVİ Judeo-Espanyol 3115 görüntüleme
7 Ekim 2020 Çarşamba

El primer djudio a ser nominado novle, egzaktamente “Sir” por un monarko de Inglaterra no era afilu inglez. Ke importa, i el rey mezmo no era inglez!

En 1688, Willem III de la Republika Holandeza konkisto la Inglaterra en una envazyon ke oy se konose komo "La Revolusyon Gloryoza". Djunto kon Willem III, ke es konosido en la istorya ingleza komo el rey William III, se topava su finansyero, konsultante i prokurador de armas de gerra, Solomon de Median. Es interesante ke su nombre de nasimyento era en realidad Diego de Medina, i era nasido en Bordeaux en los anyos 1650.

Aunke en los rejistros eskritos estava anrejistrado komo "el djudio Medina", de Medina teniya una relasyon spesyal kon William III. De otra parte, se save ke en 1699, el rey un diya komyo en la kaza de De Medina (tambyen este fakto es un primero, ke un rey inglez vijito un djudio en su kaza i mas i mas komyo kon el). Ma esta vijita es, muy probablamente, devido a ke el rey bushkava fondos para las gerras i el parlamento aviya refuzado de prokurarle la suma demandada. El titulo de “Sir” de De Medina vino poko despues, el 23 de Junyo de 1700.

Sir Solomon de Medina no se kedo muncho tyempo en Inglaterra, ma djugo un otro rolo muy importante en la istorya del paiz: De Medina ayudo al Duk de Marlborough durante la Gerra de Suksesyon espanyola (1701-1714). No solo akompanyo al Duk i le ayudo finansyalmente, lo ke es mas importante, segun el raporto del Duk al Parlamento, tambyen prokuro enformasyones vitales uzando sus intermedyaros  a traves de un sistema de komunikasyon ke era muncho mas rapido ke los kanales ofisyales.

Se deve mensyonar ke aparte de sus lavoros i ovligasyones finansyeros, politikos, i sosyales en un enturaje non-djudio, de Medina kedo fidel i aktivo en la komunidad djudia i fue un importante kontribuidor a la Sinagoga Bevis Marks de Londra. Poko despues del empesijo de la Gerra de Suksesyon espanyola, De Medina torno a Amsterdam. Kontinuo su negosyo desde aya kon la ayuda de su yerno ke lavoro komo su representante i adjenta en Londra. Sir Simon Salomon de Medina muryo en Amsterdam, (syertos dizen ke muryo sin un grosh en la aldikera), el 13 de septiembre de 1730.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel