31 Ekim 2020 Cumartesi 22:10

Una piedrita muy doloroza

Silvyo OVADYA Judeo-Espanyol 2910 görüntüleme
14 Ekim 2020 Çarşamba

  La semana pasada diya de myerkoles me ambezi del prezidente İzak İbrahimzadeh la muerte del respektavle Sinyor Jak Kamhi. Ya savia ke estava en Los Estados Unidos en Miami mirandose. Kuando me ambezi de este kavzo sesh mezes antes, de vez en kuando lo bushki por telefon o embiyi un whatsapp para demandar su situasion a su ijo Cefi Kamhi. Es djusto ke teniya 95 anyos ma no es una razon para eskapar su vida. El Sinyor Kamhi era patron de Profilo Holding. Eran produktores de frijideres i de makinas de lavar i de fregar, de televizyones i todo modo de artikolos elektronikos. En el mizmo tyempo se okupava de todo modo de organizasyones sovre el komerso, los echos i la eksportasyon. I tomo rolo en sus direksyones i mizmo fue presidente en syertas de eyas. La Kamareta Endustrial de Estanbol (İSO), La Asamblea sovre las relasyones Eksterioras Ekonomikas (DEİK), La Asosyasyon de los Endustriyales i de las Personas de Echos (TUSİAD), El Sindikato de los patrones de los echos metalikos (MESS), La Fondasyon de del Desvelopamyento Ekonomiko (İKV). I kon su lavoro izo ganar munchas kozas a estas asosyasyones.

 El Sinyor Kamhi fue koronado en 1991 por el Ministro de echos estranjeros i en 2007 kon la Medalya de Servisyos Superyores. Aparte de esto, Kamhi fue onorado munchas vezes por los Governos Fransezes, por el Prezidente de la Republika Franseza i por el Rey de Espanya. Los ke lo konosian savian ke era el amigo de todos los Konsules ke lavoravan en Estanbol i de los Ambasadores de los payizes importantes. I eran envitados a su kaza. Esto era el empesijo de sus serkas relasyones kon los diplomates ke lavoravan en muestro payis.

  Es despues de la Gerra de Kibris ke los Amerikanos defendyeron todo modo de komersyo kon la Turkiya. I este ambargo era muy trajiko por la Turkiya. Es en esta epoka ke el Sinyor Kamhi kon syertas Personas de Echo se fueron a los Estados Unidos para ke den fin al Ambargo ke se estava aplikando a la Turkiya. I reusheron munchas kozas. Es en esta epoka ke la prensa Turka konosyo de serka al Sinyor Kamhi.

  El Sinyor Kamhi dava una grande importansa a la Pas en el Medio Oriente i kreava muevas ideas ke se puediyan aplikar entre Israel i los Palestinianos kon el apoyo de la Turkiya. El era un amigo muy entimo de Shimon Peres ke era un ombre de Pas. Tuvo munchos enkontros kon Yaser Arafat el lider de los Palestinianos; i de vez en kuando Arafat le telefonava para partajar sus ideas.

  El Sinyor Kamhi ayudo su Komunidad en las relasyones eksteryores porke teniya munchas relasyones kon los lideres Djudios de las Organizasyones Djudias en los Estados Unidos. Es en 1989 ke kon los dirijentes de muestra Komunidad formaron la Asosyasyon de los 500 anyos para selebrar la Vinida de los Djudios en las tierras Turkas Otomanas. I kon esta okazyon la fondasyon kon el Ministeryo de los Echos Estranjeros izyeron un echo muy emportante para trokar el aspekto de la Turkiya en los Estados Unidos. I este lavoro tuvo un sukseso bastante importante.

  El Sinyor Kamhi lavoro anyos para la prosperidad de su payis. Tuve la onor de konoserlo de mas serka en 1989 en una konferensia de una semana en Israel: La Primera konferensia del Djudaismo Turko. I reelmente fui influensado por su komporto. I kuando me ize Presidente de muestra Komunidad kada dos o tres mezes me iva a su ofisyo para avlar sovre diferentes kavzos i para trokar ideas.

 Ke su alma repoze en Gan Eden.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GS3

Tünelin Ucu-İzel ROZENTAL

Tünelin Ucu-İzel ROZENTAL

Mozotros Ailesi- İrvin Mandel

Mozotros Ailesi- İrvin Mandel