Im Ninalu

Kenan CRUZ Judeo-Espanyol
28 Ekim 2020 Çarşamba

Im Ninalu es un poema Yemenita tradisyonal ke fue eskrito por el famozo haham Shalom Shabazi en el siglo 17. Este poema, eskrito en ebreo es konosido en todas partes del mundo i es uno de las poemas/kantikas mizrahis mas populares en muestro tiempo. Por munchos el ritmo, la melodiya, i el estilo tipiko de Yemen son las razones prinsipales i atraktivas por los kualos sienten una koneksiyon kon esta kantika. Por munchos otros, los biervos mistikos ke tokan en la neshama de kada uno son la parte mas emportante i poderozo. La fraza prinsipal de Im Ninalu es ansina: “Mizmo si las puertas de los rikos estan serrados, las puertas de Gan Eden nunka se serraron” (אם ננעלו דלתי נדיבים דלתי מרום לא ננעלו). Esta fraza fue enterpretada en diversas maneras durante los siglos, ama siempre mantuvo su popularidad i relevansiya.

 

Una de las primeras kantantes kontemporanyas ke trusho Im Ninalu a la shena global fue la Israeliana-Yemenita Ofra Haza (z”l). Ofra era una de las kantantes mas konosidas en Israel, kon su boz luzya, prezensya i personalidad unika, i mezkla espesyal de kulturas i estilos. Ofra, ke pedrimos malorozamente muy muy temprano, tambien fue konosida en el mundo largo. En 1983 eya reprezento a Israel en el konkurso Eurovizyon kon su kantika ikonika “Hay”. Un anyo despues, eya lanzo un album entero dedikado al estilo muzikal i tradisyon de los djudios de Yemen. Este album fue muy bien resivido i munchos se enamoraron de su enterpretasyon muzikal de las poemas de Rav Shalom Shabazi, ke eskrivo las palavras mas de 300 anyos antes. La kantika Im Ninalu tuvo muncho sukseso en todo el mundo i achakes de este sukseso, Ofra Haza tambien lanzo una versiyon kon biervos en inglez.

 

Unas dekadas despues, en 2005, Im Ninalu topo un lugar sentral aryentro de una kantika de un otro grande album de muzika pop. Esta vez, en un echo de la reyna de la muzika pop, Madonna. Madonna, ke tambien tiene un entereso profundo en el mistisizmo djudio i en la Kabala, kullaneo una parte de Im Ninalu en su kantika “Isaac”, ke es sovre el tema de sakrifisyo i la istorya biblika de Ishak.  Es muy enteresante por mi de ver komo los biervos ke eskrivio un haham en Yemen en el siglo 17, kontinuan oy en muestro diya a tener muevas enterpretasyones i muevos admiradores. Puedesh oyir a las dos versiyones aki:

https://www.youtube.com/watch?v=ZRnzTTYk7_Q

https://www.youtube.com/watch?v=EcRB4J5WRBE

 

 

 

 

Siz de yorumunuzu yapın

Tüm Yorumları Görün