25 Ocak 2021 Pazartesi 20:16
2n14

LA ENDIVINA DE HARBIYE

Eliz GATENYO Judeo-Espanyol 1082 görüntüleme
18 Kasım 2020 Çarşamba

En un livro de Rıfat Bali sovre Estambol del siglo pasado, el esta kontando una estorya muy pitoreska.

Al tiempo la profesyon de endivinar se aziya en las kavanes, kon kartas de djugar. Las endivinas teniyan sus klientes eskojidos. Eyas los aresiviyan kon randevus komo doktores. Aviya tanbien miradores de estreyas. En unas kayes estavan asentadas endivinas kon sira a los bodres de las paredes. Los Sultanes mizmo teniyan sus astrologos ke tomavan konsejos de eyos.

Komo en munchas profesyones i en el echo de endivinas aviya unas ke tuvieron grande reputasyon, komo la endivina ke se yamava “Kombologhu”. Keriya dizir “La Mujer Del Tespil”.

Esta damma morava en Harbiye detras de la kaza de los viyejos de los Italyanos “Artigiana”. Teniya una kaza muy luksuyoza. Kedo bivda muy manseva i engrandesyo a su ijo komo un prens. Kuando se engandesyo este ijiko se izo un kabadayi renomado de Tatavla (Kurtuluş). Madre i ijo les plaziya la buena vida. Lo mas aziyan piknikes en Kağıthane i Cendere. Komiyan pishkado kon kompanyiya i beviyan raki o bira. Todos se espantavan de este kabadayi i sus amigos. Se mesklavan en todos los pletos i afitava matansinas. Las otoritades no ozavan tokarlos por ke teniyan brasos muy largos i teniyan munchas paras.

Un diya vino una mujer ande Kombaloğu, para ke le tope las ropas de valor de su magazen  ke las peryo. Komboloğu tomo su tespil i lo metyo al garon de esta mujer. Le disho ke una paryente de Izmir era la ke las arovo. Ansina se topo la ladrona.

Su fama era tanto renomada ke la yamavan del saray del Sultan. Eya siempre aziya maraviyas. Ansina fue ke la zaptiye  se ampeso a inyervar i la defendyeron de azer este ofisyo. Kombologu era tanto rika ke esta djeza no le izo ni friyo ni kalor.

Esta konsejika me izo akodrar una koza ke bivi en mi famiya.

Mi tiyo aviya pedrido un papel de valor grande, muy muy emportante. Era emposivle de no toparlo por ke ya saviya ke estava en kaza. La kaza entera se izo de ariva abasho. No estava en dingun lugar. A la fin disheron “Kapara” parese ke se fue al sierkol. Ma kon razon estavan kon la kara preta. Una prima disho yo me va ir ande Sara, la endivina. Tomo randevu i se fue. Le konto el kavzo. Sara le disho a mi prima ke torne a kaza ke iva avlar akeya noche kon “ariva”. Mi prima se fue a kaza i le konto a mi tiyo lo ke se paso en el randevu. Mi tiyo disho “Bavajadas, eya va topar el papel ke peryi yo en mi kaza en estando eya en su kaza?”.

Medya ora despues le sono el telefon de mi prima; Sara la estava bushkando. Le disho: Dizele a tu tiyo ke yo ya le va topar el papel suyo en estando yo en mi kaza. Era, ke ya tuvo haber lo ke avlo mi tiyo en su kaza. En kurto Sara a la demanyanika les disho ke akel papel ke peryeron, se aviya arezvalado i se topa detras de los kashones de la garderop.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

MOZOTROS AİLESİ

MOZOTROS AİLESİ

TÜNELİN UCU

TÜNELİN UCU