Desde munchos anyos, ensenyo la pintura a grupos de mansevos-kreaturas, en un Kurso de Enverano.
Era un diya de Djulyo durante las vakansas. Kon un grupo de 27 mansevos, fuimos a un kafe rustiko en los kampos, para pintar i pasar un diya agradavle. Los chikos no estavan kavyendo en sus panyos, todos emosyonados i impasyentes, instalados delantre de las mezas de tavla, yenos de materyales (pasteles, kreyones, tijeras, kola para apegar…), kon las gaynas i los gatos entre los pyezes.
Akel diya, les dishe: “Realizaremos un kolaje (arte plastika del siglo XX, ke konsista en pintar i introdusir otros elementos, para krear la tresera dimensyon – papel, yerva, pluma, ets.), i kon la esperansa ke la umanidad biva libre i oroza, daremos un mesaje kon vuestra ovra, en eskrivyendo kada uno una letra de esta fraze: KREAREMOS UN MUNDO ERMOZO.” (GÜZEL BİR DÜNYA YARATALIM).
Antes de empesar, les konti una istorya real (ke es la muestra), ke akontesyo durante la II Gerra Mundiyal. Es un egzemplo de la fuersa del desen en la vida:
“Tommy era un bebe de 7 mezes, kuando en 1941, fue internado kon sus paryentes, en el Getto de Terezin, en Prag. Kuando teniya 3 anyos, el padre Bedrich Fritta, para darle un regalo de kumpleanyos, le izo desenes de la natura i la vida afuera de las murayas - para ke Tommy imajine i realize el mundo eksteryor. Oy Tommy bive en Israel, tyene mas de 60 anyos i no se olvido del ermozo regalo: los desenes de su padre.
Bushkaremos endjuntos lo ermozo, lo bueno i la verdad.”
