18 Eylül 2021 Cumartesi 01:34
izmir marriot
izmir marriot

El Han Barnathan en Galata

Silvyo OVADYA Judeo-Espanyol 1205 görüntüleme
9 Aralık 2020 Çarşamba

La semana pasada eskrivi un artikolo sovre el Diya del Ladino. Dospues Karen me disho ke teniamos una seduta kon los Israelis, Amerikanos, Arjentinianos … para organisar un diya Mundia (reelmente internasyonal). Ma a la fin desidimos ke el diya internasyonal se va realizar el 17 de marso (dia kuando se fundyo la Autoridad Nasyonala del Ladino i su Kultura) i solo por dos oras. I despues dimos karar de organizar el diya nasyonal del Ladino de Estambol, komo vos konti la semana pasada.

  Muestro amigo Metin Delevi pasa muncho tyempo karishtreando el internet i en el grupo de whatsapp del muzeo mos eskrive syertas kozas ke de vez en kuando devo de lavorar unas kuantas oras para entender el sujeto a la ondura. I diya de vyernes mos embiyo un livro sovre el Han de Barnathan ke se esta restorando en Yüksek Kaldırım serka del Tünel. Ya ay un anyo ke kada vez ke me topo serka de este edifisyo me vo a ver lo ke estan azyendo. Reelmente es un edifisyo ke fue fraguado kon grande gusto. I kuando vide el livro immediatamente topi la kompanyia ke lo esta restorando i alkansi despues de unas kuantas oras i me ambezi ke el livro no fue publikado. Avli kon un responsavle i le enkomendi dos livros kuando va ser publikado; uno para el muzeo i el otro para mi. I les aprometi ke ya puediya ayudarlos para syertos detalyos.

  Komo no teniyamos derecho de salir a la kaye diya de shabat me alevanti de la kama i antes de meldar la gazeta meldi ei livro ke avia estampado en mi buro. Fue muy emosyonante de meldar este livro i konoser una partida de la famiya Barnathan. Malorozamente vemos ke entre la grande partida de esta famiya ke emigraron a Fransia una partida de sus miembros toparon la muerte en el Olokosto.

 Es la sinyora Çiğdem Oğuz ke izo bushkedades en este sujeto. I topo solo una persona ke mora en Estanbol. No se si bive dainda; es una mujer ke torno a Estanbol kon los trenos dalkavo ke fueron organizados por el Ministeryo de los Echos Estranjeros de la Turkiya. I la sinyora Oğuz alkanso a topar syertos miembros de esta famiya: Jean Claude Barnathan; Elliot Barnathan (el mora en los Estados Unidos) i Francis Wacziarg (ke morava en India- malorozamente, mos desho la vida unos kuantos mezes despues ke la bushkadera izo kon el syertos reportajes verso la fin del anyo 2014); Cesar Alfredo Barnathan (Buenos Aires-Argentina) i Stella Barnathan ke bive (en el anyo 2014) en Estanbol. Estas personas kontaron ke teniyan un otro han en Eminönü ke teniya el nombre de Barnathan, ma despues ke fue vendido tomo rel nombre de Nasırzadeler Han. I sin tomar reflo bushki dos amigos: el uno Yaşar Abuaf ke tyene dainda una botika en este han i me konto sovre el sinyor Anri Russo ke konosiya muy bien ke sus tiyos (tres ermanos de su madre) eran los patrones de este Barnathan Han. Ma lo vendyeron en el Varlik Vergisi para pueder pagar el dasyo indjusto ke les demandaron. Era sus granpapa Barnathan ke lo avia fraguado verso la fin de los anyos 1800.

 Avli una ora kon Marsel Russo, su ijo, despues ke meldi el livro i me disho ke no avia sintido esta parte de su famiya. Mizmo me konto ke avian vijitado en famiya unos syertos Barnathanes en Milano kuando teniya 13-14 anyos i ke teniya una ija mas aedada de el.

 A la fin embiyi mesajes al responsavle o al patron del edifisio para estar en kontakto kon la bushkadera i para dar i tomar syertas informasyones.

 Estan kontinuando la restorasyon del edifisyo i kreo ke van a avrir un otel aya. I un livro sovre el Han Barnathan va ser publikado en la mizma epoka.

 Esto eskapando mi artikolo en augurandovos una buena fiesta de Hanuka; Hag Hanukah Sameah.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel