26 Ocak 2021 Salı 04:39
2n14

Un otro sovrebivyente sefaradi de la Shoah mos desho la buena vida: Isaac Revah

Metin DELEVİ Judeo-Espanyol 3019 görüntüleme
6 Ocak 2021 Çarşamba

En meldando el boletin de los Sefaradis de Fransiya, el Alsyete, vide un aviso:

Es kon grande tristeza ke anunsyamos la muerte de muestro amigo Isaac REVAH, myembro de muestra direksyon, una grande figura de la komunidad judeo-espanyola I de la komunidad de investigasyones de la Fransiya.

Yo ya tuve la onor de konoserlo, eskrivirle I oyirlo.  Era un ardyente defansor de la memorya de la Shoah I de la kultura djudia de Salonika. Era uno de los pokos sovrebivyentes de Salonika. Era surnomado Kaki, el nombre ke le dyeron en sus dias kon los “Eclaireurs Israélites de France”.

El kontava muncho la istorya de los Djudios Espanyoles de Salonika durante la Shoah, la deportasyon I la liberasyon. Vos kero dar un resumen de esta istorya fasinante ke fue publikado en el boletin del Alsyete, I devo de ajutar ke el teniya 9 anyos en este tyempo:

“Los almanes okuparon el norte de la Gresya en Avril de 1941 I arivaron a Salonika en tres días. Pishin aplikaron las leyes rasyales i aplikaron las prekosyones anti-djudias en 1942: lavoro forsado obligatoryo, ekspropriasyones, el derrokamyento del semeteryo ets.

45.000 djudios de Salonika fueron deportados (95% de la povlasyon djudia) a Birkenau. El ultimo grupo fue deportado en Agosto de 1943.

Ma un grupo de 520 personas mirakolozamente kedaron intakto asta Julio de 1943: eyos teniyan la nasyonalidad espanyola I mi famiya estava en este grupo.

Durante este peryodo, la Espanya no amostro un apoyo verdadera a sus suditos. Amostro ezitasyones, pasividad i lo mas improtante no aprovo afilu una tentativa, egzaktamente al kontraryo del goverono italyano, ke syempre amostro apoyo I proteksyon a sus suditos djudios.

Malgrado la pozisyon ofisyal negativa de su pais, el konsul jeneral de la Espanya en Atina, Romero Radigales, en esta pozisyon desde Avril de 1943 (I ke komunikava kon Madrid a traves del Ambasador  de Espanya en Berlín, Gines Vidal), ansi komo el Konsul de Espanya en Salonika, Salomon Ezratty, primo de mi padre, no desharon nunka los esforsos para evitar la deportasyon de sivdadinos de un estado en el mizmo kampo ke la Alemanya.

En vano demandaron la permisyon a los alemanes para "repatriarlos" a Espanya.

El Ministeryo de Eksteryor de Madrid se amostro pasivo I ezitante, I ademas fue kontra de esta idea i en realidad no konsidero avrir sus frontyeras a los djudios espanyoles I deklaro ke la Espanya "no era kapachi de entegrar a tantos immigrantes".

Ma Franco, en 1943, vyendo el trokamyento en el ekilibro de fuersas ke empeso a ser favorable a los aliados, desidyo a konsiderar una solusyon por la repatriasyon de estos djudios kontra una kompensasyon finansyera importante de la parte de los Amerikanos.

Por sus parte, los almanes kijeron dar un tyempo a los sivdadinos de un estado amigo: desidyeron no deportarlos pishin.

Dyeron una data limita, a saver fina la fin del mez de Junyo de 1943, a la Espanya para tomar una desizyon en este kavzo. El Ministeryo de Eksteryor Espanyola, no dyo una reaksyon imedyadamente”.

(Podesh meldar la totalidad de esta istorya en Fransez en:

http://www.alsyete.com/wp-content/uploads/2011/08/Les-Juifs-ressortissants-espagnols-de-Salonique-et-la-Shoah-par-Isaac-Revah.doc)

Isaac Revah tuvo una vida muy aktiva, yena de emosyones. Para empesar, un viyaje desde Salonika a Bergen Belsen, despues, la liberasyon en arivando a la Espanya, despues de la gerra arivando a la Palestina, de aya a Meksiko por un kurto tyempo, I finalmente aresentandose en París ande va ser uno de los lideres del programa espasyal fransez, sin olvidar su lucha para no olvidar la memorya de la Shoah.

Ke su alma repoze en Gan Eden…

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

MOZOTROS AİLESİ

MOZOTROS AİLESİ

TÜNELİN UCU

TÜNELİN UCU