27 Kasım 2021 Cumartesi 11:49

TU BİSHVAT, LA FYESTA DE LOS ARVOLES

Dora NİYEGO Judeo-Espanyol 1538 görüntüleme
27 Ocak 2021 Çarşamba

Kuando el puevlo judyo fue ovligado a bivir en el egzılo, los judyos komo izyeron en las otras fyestas, se yevaron la fyesta de Tu Bıshvat  kon eyos, i komo memeorya de sus payis, se yevaron las frutas de Israel tambyen.

En el egzilo, kada anyo, kuando viniya esta data, las kazas judiyas selebravan (komo oy en diya) esta fyesta kon las frutas de Israel; uvas, sevada, muezes, igos, datiles, olivas, granadas. Estas son las frutas ke forman ‘los syete espesies’ de la tyerra de Israel. Los judyos, en el egzilo, diziyan ke estas frutas illuminavan los kantones areskuros del egzilo, i ke ansi, la luz de los syelos de Israel puediya entrar a kada kaza. La dulsurya de estas frutas, alivyanava la amargura de la vida del egzilo, i se akodravan ke la tierra de Israel esta asperando a sus ijos.

Duspues ke los judyos tornaron a sus tyerra, esta fyesta gano una mueva sinyifıkasyon. Esta data se tranformo komo ‘el diya de plantar arvoles’. La Torah  dıze; ‘I kuando vaza entrar a tu tyerra, vaza plantar arvoles de frutas’. Segun la Torah, kortar un arvole, es komo matar una persona.

Kada anyo, Tu Bishvat es el 15 del mes de Shevat. Es la fyesta del anyo muevo de los arvoles, i tambyen el empesijo de la primavera. Kada anyo selebramos esta fyesta kon toda la famiya reunados en el entorno del seder. En el seder, komemos estas frutas, en dizyendo la Beraha de kada fruta. Tu Bishvat mos da la nuvela del nasimyento de la natura. En esta fyesta, los judyos del mundo entero son reunidos en komyendo las mezmas frutas, las frutas del payis santo (mezmo los ke biven en los mas yelados lugares), i en dizyendo la priera de la natura.

Los arvoles son emportantes por munchas razones. Eyos mos dan frutas, mos azen solombra en los diyas kayentes, abrigan los animales, dan oksijen i umididad a la tyerra, i evitan la erozyon.

Segun la Torah, ensembrar arvoles es una mitzva. El Dio mos kreyo el ganeden, i mozotros kale ke kreamos guertas. Tu Bishvat se fyesta en kada kaza judiya, embezando a muestras kreaturas la emportansa de los arvoles i de las plantas, ansi aparejando muestras kreaturas a la vida, eksplikandoles la emportansa de la agrikultura por las personas.

Tu Bishvat mos da otros mesajes tambien. En esta fiesta, en las sinagogas, los rabis mos transmeten los mesajes de Tu Bishvat ke son muy emportantes por la kontinuasyon del judaizmo, i por la edukasyon de muestras kreaturas. ‘Muestras kreaturas son muestras frutas, i kale ke esten atadas a muestras tradisyones, komo son atadas las frutas a los arvoles. Kada arvole, para ke se engrandeska derecho, kale ke seyga kultivado. De mezmo, kale edukar muestras kreaturas, ambezarles muestras fyestas, muestras tradisyones, para ke se engrandeskan derecho. Las frutas ke son atadas buenas a los arvoles, no kayen presto, kresen i kedan sanas. De mezmo, si edukamos bueno muestras kreaturas, eyas kedan empyes komo los arvoles, i dan frutas ermozas. Ansi, los arvoles mos dan mesajes, mos ambezan komo engrandeser muestras kreaturas. Los arvoles toman sus fuersas de sus raizes, i no se derrokan mezmo en las mas grandes tampestas. De mezma manera, las personas ke tyenen kreensya, i dan emportansa a las valores morales, topan la fuersa de gerreyar kon todas las difikultades ke se enkontra en la vida’.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV Şalom Spotify'da GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental