29 Temmuz 2021 Perşembe 19:00
Radisson

TU BI SHEVAT

Judeo-Espanyol 1520 görüntüleme
27 Ocak 2021 Çarşamba

 SAVER ES BUENO  İsak Eskinazi

Me akodro de mi chikez kuando mi madre mos preparava un tifsin yeno de frutas sekas dizyendomos “Esta noche es Beraha las Frutas”, “La Bendisyon de las frutas”. Akel tiempo, me tresaliya de komer las frutas sin azer atansyon a las eksplikasyones ke mos davan. Achakes de mi Bar Mitsva ke empesi a frekuentar la Sinagoga, me ambezi ke este diya es “El Anyo Muevo de los arvoles”. Un anyo muevo entre los kuatro ke tenemos en el kalendaryo Djudyo.

Ansi empesi a entender el sentido del nombre de esta fiesta ke empesa kon TU ke kere dizir en Ivrit, “TET” i “VAV”, las dos letras del alfabeto Ivrit ke sinyifikan “9” i “6”, lo ke aze una suma de “15”, kon el nombre del mez de “Shevat”. En realidad, el numero kinze se deviya de ser eskrito kon las letras “Yod” i “Hey”. Porke “Yod” es “Dyez” i “Hey” es “Sinko” según la gematriya. Solo estas dos ultimas letras azyendo aluzyon al Kriador, por konvensyon se utilizan las letras Tet” i “Vav”. Avlando de Anyo Muevo saver ke en Ivrit, esta fiesta se yama “Rosh a shana le ilanot”, “Anyo muevo de los arvoles”.

Esta fiesta para mi tiene un doble sentido, porke mi inyeto ke nasyo en Los Estsdos Unidos i ke agora bive en Londres, se yama “Ilan” “Arvoliko”. Esto seguro ke mi inyeto se va engrandeser komo un arvole independyente i robusto atado a sus raizes ansestral. La tradisyon era de plantar arvolikos en la guerta de la Sinagoga i oy esto seguro ke las ovras de bienfezensya estan aktivas para kumplir esta trasdisyon.

Se kreye ke esta fiesta tiene su raiz en la antikuedad, porke el kinze de Shevat ya es kaji el empesijo de la primavera, o mijor dicho, el empesijo de la zona de la agrikultura. Desde el siglo 17 ke empesó la kostumbre de preparar un seder tal komo lo preparamos por Pesah. La eskola de Hillel selebra esta fiesta komo lo uzamos el 15 de Shevat, ama la Eskola de Shammay dize ke devemos de selebrarlo el 1 de Shevat siendo el Muevo anyo de los arvoles. No olvidar ke semos bastantes rikos en selebrar anyos muevos. Porke tenemos 4 anyos muevos. En el Seder de Tu bishvat, es una mitsva de komer las frutas ke kresen en Eretz Israel komo datile, almendra, igo, uvas sekas, zirguelas o avramilas sekas, kayisis (arborikokes). Muez i avyanas dan otro pasto al plato. En Israel, la kostumbre es mas muncho de plantar muevos arvoles, komo los arvoles de Okaliptus ke fueron plantados para evitar la malarya, o arvoles ke formaron muevas sharas. Esta tradisyon empeso en el siglo 19 kon Ribi Zeev Yavetz, ke yevo sus elevos a Zihron Yaakov para plantar arvoles. En el empesijo del siglo 20, El Fondo Nasyonal Djudyo ke se yamo Keren Kayemet le Israel aze lo posible de trokar en vedre la tierra arida del payis. Una koensidensya aze ke sea la Universita Ebraika de Yerushalayim, sea el Tehnion de Hayfa, i sea la Keneset fueron inogurados en Tu BiShvat.

Oy Tu Bishvat es una oportunidad para akodrar, pratikar la ekolojiya i konservar la natura komo mos dizen las leyes de muestros padres. Ke orozos devemos de sentirmos de tener toda la saviduriya i la lojika en las fiestas ke se pueden adaptar a muestros diyas en este mundo trublado.

 

 


Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel