29 Temmuz 2021 Perşembe 18:34
Radisson

Un livro sovre los proverbos

Judeo-Espanyol 1677 görüntüleme
27 Ocak 2021 Çarşamba

  Esta semana esto muy okupado porke devo de eskrivir dos artikolos; uno para el Şalom i el otro para el Amaneser. Despues ke empesimos a tener abonados dijitales, me dishe ke devo de tratar sujetos mas seryozos. Porke mos estan dando una grande empotansa. I si meldatesh, empesi a eskrivir syertos artikolos sovre los foburgos de Estanbol ande moraron buen karar de Djudios en los anyos mismo en el/los siglos pasados. Ya savemos ke Hasköy i Balat son los mas famozos i La Kula (Galata) en el 20en siglo. Ma kreo ke Kuzguncuk fue un foburgo muy emportante mismo si no teniya una populasyon komo los dos primeros. Este mez, vash a topar un artikolo sovre Kuzguncuk.
  Diya de djueves el sinyor Gökay me telefono i me disho ke estavan muy kontentes kon su mujer Simha de pueder meldar el livro de Leon Benatov de Bulgaria ke fue publikado i importado por el Sentro Sefaradi. “3200 proverbios judios, ekspresiones, shakas i mas". Reelmente kero felisitar el sinyor Benatov por sus esforsos. Di una eksplikasyon al senyor Gökay ke mos puede rengrasyar solo i solo porke lo importimos.
  Ya savesh ke Karen esta azyendo por la Ermandad Sefaradi de Nueva York un program ande esta ambezando el Judeo-Espanyol o el Ladino komo emplean los Amerikanos. I la semana pasada su sujeto era el Judeo-Espanyol del bel por abasho (kon kulo i pedo) i maldisyones ke se emplean en muestra lingua. Kale achetar ke no es puedeser un sujeto muy novle ma se deve tratar. I una amiga ke bive en Israel telefono a mi mujer dizyendole ke no le plazyo lo ke konto Karen. Esto es muestra lingua? Kifures i maldisyones? Kreo ke era la primera vez ke estava sigiendo este program; i si kontinua va ver ke no es este modo kada semana. No fue muy fasil de pueder importar estos livros ma alkansimos; i es muestra Gila del Şalom ke fue kapache para vender la meatad en unos kuantos diyas. Reelmente es un livro muy enteresante i no ay una grande diferensia entre los proverbos judeo-espanyoles empleados por los Bulgaros i por los sefardim Turkos.
  No puedesh topar en munchos livros una partida sovre las maldisiones i amenasas i de la otra vanda proverbos sovre el Dio. Ay sinko o sesh diferentes partidas sovre los animales (azno, perro, gato, gayo i otros animales). En syertas partidas se tratan sovre la madre, la ija, el ijo, la kaza, el marido, el kazamiento i un alay de otro sujetos.
  Si keresh merkar, el presyo es 115 liras turkas i puedesh embiyar un mail a karensarhon@gmail.com o puedesh embiyar un whatsapp al numero 05424258176. Esto es para la Turkiya. Si estash afuera de la Turkiya anda al sitio www.istanbulsephardiccenter.com i azé vuestra komanda de aya.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel