La kerida “Nona” Flory Jagoda mos desho a los 97 anyos. Eya mos inspiro. La vamos a nombrar kon su boz melodioza.
Kerida Flory,
La kansion ke mos legates, “Purim Purim lanu, PESAH en la mano", la kantimos el 1 marso, 2018, dia de PURIM en ORYOM, una institusion unika ke ayuda i se enteresa a muestra komunita judia.
En intentando de inspirarmos de tu boz melodioza, te vamos a nombrar...
Tu, kantante ermoza, dulse nona, kontando i kantando, la gitara en la mano, mos emosionates. Tus kansiones romantikas i melodiozas nunka me las olvido...
Kompozates munchas kantikas i supites seriozamente konservar muestra lingua ansestral, el judeo-espanyol... Sos para mozotros un pasharo ke mos dio keyf a la alma.
Tuve el plazer de konoserte en Estambol, en Bilgi Üniversitesi, en 1992, kuando vinites por un konsierto. Era la primera vez ke partisipava a un konsierto en la lingua de mis padres. Fue una nostaljia - me izites akodrar de mi chikez...
Kerida Flory,
Anyos pasaron i yo esto kantando en el koro NES kon muestro kerido profesor İzzet Bana.
Purim Purim Lanu
(Flory Jagoda) Sarajevo
Purim Purim Purim lano
Pesah, Pesah en la mano
Las masas s'estan aziendo
Los yaprakes s'estan kozyendo...
Aman Aman... aman aman aman
El Dyo Bendicho mos da mazal.
Purim Purim Purim lano
Pesah Pesah en la mano
La nona sta dizyendo a los inyetos
Alimpya el polvo kantones i los techos
Purim Purim Purim lano
Pesah Pesah en la mano.
El sinyor Rabbi disho a las tiyas
No komer pan Ocho diyas...
LA KAPARA
El nono mos yama
A las sinko de la manyana
El gayo sta gritando
A todos espertando
Deshame durmir, no me kero alevantar...
Deshame durmir, el Dyo me va perdonar...
Ermozas ijikas,
Izyeron las borekitas,
Todos las estan komiendo.
I el raki ya 'stan bevyendo.
Deshame durmir, no me va alevantar.
Deshame durmir, el Dyo me va perdonar.
Repoza en paz, kerida melomana Flory Jagoda.
Supites alegrar la umanitá
