Para diya de alhad el 21 de febrero a la ora 16-19 tenemos el Diya Internasyonal del Ladino en el ZOOM. De uzo kada anyo el diya lo eskapamos kon un teatro i kon kantes. A un safek el djugo de este
anyo ya estava pronto, kon una esperansa ke ivamos a salir a la shena i lo ivamos a djuguar ma la korona no mos dyo permisyon, el teksto kedo en el kashon. En azyendo el program del diya, mozos los
“Amigos Para Syempre”, no mos kideyo la alma de no azer teatro. E komo se va azer teatro en ZOOM??? Ya es verda ke en el enterval de la corona izimos dos skeches en ZOOM ma un teatro no es posivle. En el grupo "Amigos Para Syempre" nada es emposivle. En turko dizen “her işte bir hayır var”, en todo mal ay un byen. Me disheron, Forti tu
eskrive, ke seya en ZOOM, kada uno de su kaza. Kon esta idea salimos a kamino ma frekuentar kon mansevos es muy ermozo. Muestra amiga kerida, RINA MURABEN mos dyo una idea alavada i kon grande sakrifisyo mos arekojimos i mos ambezimos una metod mueva. Mozos mezmo no mos kreyimos komo parvinimos a azer este teatro. Para ke no se vaya la sorpresa, no vos va dizir komo lo realizimos; ya lo vash a ver. Solo vos puedo dizir ke el nombre es LOS ALKULUMBRES. Vos asperamos para alhad kon un program alavado!
