16 Nisan 2021 Cuma 04:50
Beymen 5-20Nisan
Beymen 5-20Nisan

UN TORNIKO EN LOS REKUERDOS

Eliz GATENYO Judeo-Espanyol 3995 görüntüleme
3 Mart 2021 Çarşamba

En estos diyas ke estamos aprezados en las kazas, todos los diyas se paresen. Aparte de diya de Shabat, ke diya es oy? Lunes? Mierkoles? Alhad? Kada diya es mizmo. Los diyas i las noches se mesklaron. Ya se alimpyo, ya se gizo, ya mos trusho el bakkal, el zarzavatchi, el Migros, lo ke enkomendimos. Ya se dezenfekto esto todo de ariva-abasho. Se enshavonaron las portokales, las domates i los pipinos, se metyeron a su lugar. I despues mos asentamos a bever un kafiko i avlar de aki de aya, en vezes mos metemos a pensar. Desde un anyo ke este hal esta lo mizmo. No ay buelta. Vos kero dizir ke mizmo ya me se eskaparon los rekuerdos.

Los mas ermozos rekuerdos son los rekuerdos de mi chikes. Mi chikes ke paso en el kartiye entre Galata i la Kula. Me akodro unos a unos los magazenes i los patrones de estos magazenes. Azeremos un torniko por akeyas partes.

Ampesaremos por Galatasaray. De Galatasaray en viniendo para el Tünel, si alevantamos las kavesas vemos munchos apartamentos fraguados kon un estilo maraviyozo. Dekorados kon rozas i fyongos i mizmo statuas de marmol.  Aya se topavan los pasajes famozos ande se vendiyan kozas para kusturas, astares, botones, ilos i chapeyos, rozas artifisyales de kolores a kolores para meter en las yakas de los kostumes. Aviyan magazenes ke vendiyan ropas de kualita. ÜçFil, Hacı Resul, Dekor i Rekor. El magazen de Lazaro Franco el mobiliaro, el Magazen Karako ke vendiya vidreriya, porselenes de alta kualita. El Pasaj Karlman ke saliya por la otra parte a Tepebashi. Aya se topavan munchas botikas de broderiya i vistimyenta. Puedo dizir ke era el primer AVM de Estambol.  Abashando para el Tünel, teniyamos el magazen Mayer ke vendiya vistimientas para ombres, Lion Mağazası ke vendiya munchas kozas diferentes komo vistimientas i vidreriyas. El magazen Bakara i Evin ke vendiyan vidreriya, biblos, kuadros de  gusto fino.  El djoyero Diamandstein. El korsetiero Kelebek.  Zahariadis ke vendiya tovajas, külotes i atletes. Munchos famozos samareros.  En abashando para el Tünel ampesavan las libreriyas. La libreriya Rusa, la libreriya Hachette ke se yamava antes “Librerie Mondiale”, la libreriya de Elfi, las ermanas Kohen. I a la fin el magazen Real ke vendiya korses, sutyenes i artikolos de ortopediya a la demanda.

Vinimos al Tünel. El tünel ke abashava i suviya entre Karaköy i Pera se topava debasho de Metro Han. Un blok de apartamento. Debasho se topava la famoza sharkuteriya Mandra. No kreyo ke averiya mansevos ke no komyo de los sandvichikos kayentes de aya. Delantre de este metro han se alevantavan los tramvayes ke se ivan a Kurtulush el numero 70, Shishli numero 50 i Machka numero 60. Todos los elevos ke saliyan kaje en mizma ora de las eskolas del kartiye, se topavan aya i era un djumbush de manseves alegre.

Keridos lektores, komo ya vesh, ya inchi los 500 biervos de mi kanton. Ama no eskapi de kontar todo. Si kere el Dio, va kontinuar la semana ke viene. Kedá en buenas oras kon sanedad.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ