22 Eylül 2021 Çarşamba 13:41
izmir marriot
izmir marriot

Sami Kohen esta kontando: Dame la mano “El Mundo”*

Silvyo OVADYA Judeo-Espanyol 3606 görüntüleme
17 Mart 2021 Çarşamba

   En mi chikes no merkavamos un diaryo en kaza. Mi padre lo meldava en el echo i lo merkava solo los diyas de alhad. Merkava el Milliyet ke tenia en su suplemento un rompekavesa ke puediyas pasar medio diya para rezolverlo. Mi madre komo era de orijin franseza no se entereso muncho kon el diaryo turko. Es despues de trenta anyos en Turkiya ke empeso a meldar kada diya un diaryo. Ma les plazia oyer la radio BBC en fransez ke azia mizmo munchos parazites. Kuando tenia apenas 11 anyos en enverano empesi a merkar el diaryo Milliyet en primero por las dos pajinas de spor i despues para meldarlo entero. I es en estos anyos (1962-65) ke tuve la posibilidad de konoser a Sami Kohen i de meldar sus artikolos.

  La semana pasada me telefonaron dizyendo ke tengo un livro ke me fue embiyado por el famozo djornalisto Sami Kohen. I a la fin lo resivi. Sami Kohen es el ijo del famozo djornalisto, Albert Kohen. El lavorava en la Banka Selaniko i komo era un entelektual de su epoka eskriviya en los semanaryos ke se publikavan en Djudezmo. Despues publiko la gazeta “La Boz de Oriente" i el Sami Kohen su ijo se topo en un entorno entelektual ande se topava munchos djornalistos, eskrivanos i poetas de alto nivel. I el dyo karar de ser djornalisto. Era enterasado en la diplomasia. Devemos de achetar ke despues de la Republika Turka komo no era muy kolay de ser diplomat turko para un djudio, Sami Kohen eskojo el buen kamino i dyo karar de ser djornalisto. No solo en Turkiya. Komo se ambezo el Inglez i el Fransez, era un djornalisto bastante renomado en el mundo entero. Despues de la muerte de su padre, Sami empeso a publikar el jurnal de su padre trokando su nombre a “La Boz De Türkiye”.

   Es kon este livro ke tuve la posibilitad de ambezarme ke Sami Kohen fue kandidato a la Asamblea Nasyonal komo deputado i despues ke fue elijido komo miembro al konsilyo de la munisipalidad d’Estanbol.

Es Sami Kohen ke realizo el primer reportaje kon el Papaz Makarios, Prezidente de la Republika de Kıbrıs. Tengo su livro ke fue publikado despues de su viyaje a la China i su reportaje kon Mao Che Tung. Mirando en su livro i en el internet vide ke Sami Kohen vijito dos vezes la China en el 1971 i 10 anyos despues. No me akodro si su livro fue publikado despues de su primer viaje o de su segundo? Ya se ke vijito el Vietnam; la Albania; la Yugoslavia de Tito... I para syertos payizes era uno de los primeros djornalistos. Eskrivyo sus artikolos en el Milliyet i en syertas gazetas Evropeas i Amerikanas.

   Kale achetar ke Sami Kohen era un djornalisto i un ambasador. Todos los lideres de los payizes tuvieron konfiensia en el. Se ambezaron ke era un ombre korekto i ke eskriviya la verdad i lo ke le disheron estos kapos. Es por esto ke vos dishe ke Sami Kohen puediya ser un ambasador emportante en la politika de su payis. Si konosesh el Turko, vos konsejo de meldar este livro. Reelmente vos vash ambezar munchas kozas sovre la istoria del djornalismo Turko; de la istoria de muestro payis, mizmo de muestra komunidad. I vos vash ambezar syertas kozas muy emportantes. Kreo ke oy en diya Sami Kohen es el mas aedado djornalisto de muestro payis i dainda todo el entorno de prensa tyenen un grande respekto para Sami Kohen. Kon sus anyos eskrive artikolos emportantes.

  Devo de avlar unos kuantos biervos sovre su mujer, Mirka. Reelmente no fue kreo muy fasil de tener un marido tan famozo i tan okupado. Kreo ke es eya ke se okupo kon sus kriaturas, kon sus eskolas i kon sus edukasyon. Le oguro salud buena i munchos artikolos muevos ke van a ser publikados.  

 *Sami Kohen, Anlatıyor: Ver Elini Dünya, Nihal Boztekin, Edisyones Libra 2021

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel