30 Kasım 2021 Salı 03:05

DEL ESKLAVAJE A LA LİBERTAD..PESAH

Judeo-Espanyol 1656 görüntüleme
24 Mart 2021 Çarşamba

Hayim Behmoaras

Keridos i keridas, vos saludo a todos kon muncho eskarinyo. Esta semana tenemos muncho yugo, yugo de espajar, yugo de emplear, yugo de gizar porke Shabat la noche vamos a salir a un grande viyaje.Tenemos un kamino muy largo, de 40 anyos. Estamos salyendo de Mitsrayim para salvarmos del esklavaje, i vamos a ir a las tyerras santas para la libertad. En este largo viyaje, aviya anyos muy difisiles, ma aviya neses, aviya kerensia, aviya kreensia i a la fin kon el Dio Baruhu aviya libertad. El nombre de este viyaje es PESAH.

En esta noche vamos a meldar la agada kon korasones yenos, ma estamos un poko abatidos, porke malorozamente por kulpa de esta korona mallograda estamos solos, estamos apartados de la famiya.

Ma las tradisyones todo el momento se van akodrarse syempre, son muy emportantes para mozotros. Mizmo si estamos solos, lo azeremos todo djusto i en regla.

Me esto akodrando kuando teniya 12 - 13 anyos, la primera noche de Pesah se aziya en la kaza de mi granpapa, teniyan una kaza donde el salon era muy grande.

30-35 personas aviya en esta noche, solo mi granpapa eran 6 ermanos, i las famiyas. I los envitava a los vizinos, el apartamento era solo judio, i eran todos paryentes.

El mas chiko de la meza era yo, por esto el bogo de masa lo deteniya yo. Para mozotros los ijikos, enpesava la agada i no saviya eskapar i mos viniya enfasyo. Kada pasuk en ebreo, en judeo espanyol i para dar a entender a los chikos, en turko, kaji una ora i medya sureyava. Kada uno meldava un pasuk, babam no ay eskapasyon. En la agada me plaziya kuando se lavavan las manos, despues Dam, Tsefardea, mi madre me serrava los ojos, i los bokados me plaziyan, maror, harosi, matsa i a la fin kuando diziyan yuhulululu i chafteyavan a los ombros, las mujeres diziyan Bendicho El Dio, ya eskapo la agada.

I empasava a vinir a la meza Bimuelos, Prasifuchi, Pasteles, Enchusa de Espinaka, Albondigas de Prasa, Guevos haminados i peshkado dezazido sin espina kon mayonez ke te chupavas los dedos. I empesavamos a komer, riyir i burlar. Despues viniyan las komidas kayentes, Bizelya, Chali, Berendjena frita kon Patatas kon Gaina, mmmm, Rulikos de Espinaka, a la fin Fruta i Tezpishti. Kuando se eskapava todo, los kafes se beviyan en la meza, kon las kantikas ermozas.

Me vino muncho eskarinyo de estas ermozuras. Keridos vos abraso a todos de alma i de korason, al otro anyo kon mezas yenas, i kon todos endjuntos...

HAG  PESAH  SAMEAH.

 


Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV Şalom Spotify'da GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental