17 Nisan 2021 Cumartesi 15:07

LA VENIDA DE LA PRIMAVERA

Şeli GAON Judeo-Espanyol 2767 görüntüleme Sesli Dinle
24 Mart 2021 Çarşamba

          Malorozamente no vamos a pueder fyestar “PESAH” kon toda la famiya i este anyo a kavza de la “Corona”, en el entorno de una meza byen ornada, azyendo la Agada, kon muncha djente de edades diferentes.

          La vinida de Pesah mos aze pensar al invyerno ke ya se eskapo, i ke la primavera esta en la puerta. Pesah es el empesijo de los tyempos dulses. En el primer dia de esta fyesta, en las sinagogas del mundo entero rogamos al Todo Poderozo ke mos de el rosiyo, ke es el sembol de esta sezon.

           La Primavera es la sezon ke las inyeves empesan a dirritirsen, las luvyas pujan, las flores enfloresen en los kampos i la natura se aribive. Esto es la kavza de ser mas positivos i mas optimistos. Los arvoles se envedresen, las ojas se aresfreskan, todo el trokamyento de la natura es una egzaltasyon para las personas, para ser mas aktivos i alegres.

          Estambol es una sivdad mirakulosa ke no savemos la valor malorozamente. El festival de las tulipes empeso en la Arvoleria de Emirgan en Estambol. Todas las rozas de kolores diferentes, estan kreando una armoniya kon el tyempo puro i limpyo, golyendo la tyerra, i la natura kalma, estan dando el repozo a la persona. La natura es la vida, es la vejetasyon, es las rozas, es el aver... La primavera es una sezon ke traye la felisidad i el entuzyasmo de bivir. En esta sezon tivya, las personas pueden profitar de las ermozuras de la natura, del sol ke melizina los romatizmos. Los dias se empesan a alargarsen, los pasharos kantan kon sus bozes ermozas, las yervas freskas se engrandesen, el syelo es klaro, el sol briyando i la mar tyene una kolor blu sin olas. Esto todo aze sentir a la persona orozo de todo modo de evenemento.

           Por enalteser en la primavera muestra enerjiya kale echar tino a lo ke estamos komyendo i bevyendo. Komeremos mas muncha zarzavat i fruta, i beveremos mas muncha agua. Kale apersivirse de las kozas ke tenemos en muestro doredor. Las flores, las personas ke mos keren byen, los guesmos, la tyerra, i munchas otras kozas. La Primavera es la sezon la mas amavle entre las kuatro. Es la sezon de la espertura de la vida. La kanserya, la desfuersa son las influensas negativas enriva las personas.

Los tyempos ke se kayentan son la kavza de los desvelos, de ser sin gana, de las dolores de las artikulasyones, de las suvidas i abashadas sentimentales i de la kanserya. La adaptasyon a los tyempos de esta sezon puede sureyar unos dos mezes.

Las dolores ke se ven en la primavera son en el entorno de la kavesa, de la garganta, de la espalda, del bel, migrenes… Estas dolores se influensan de la umidita, del ayre, de la luvya, de la presyon del tyempo, del trokamyento del tyempo entrel dia, de lo yelado a lo kayente, de lo kayente a lo yelado, a la luvya i otros trokamyentos inesperados.

           Desharemos esto todo i biviremos el momento, porke la vida es solo este momento.

          Arrogaremos al Todo Poderozo, ke mos salve de este virus maldicho komo mos salvo de Mistrayim…

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ