17 Nisan 2021 Cumartesi 13:30
Beymen 5-20Nisan
Beymen 5-20Nisan

MALGRADO TODO

Forti BAROKAS Judeo-Espanyol 875 görüntüleme
31 Mart 2021 Çarşamba

En mi chikes, apenas eskapava Purim, en las kazas enpesava un movimyento. En primero era enkalar la kaza i despues kon sira, azer kashones i kantones, lavar las mantas, dar los kolchones al hallach. Mi nona ya empesava azer planos del seder de pesah. Kuando se aserkavan los diyas, era majar la moez, pasar la prasa por el tropito, eskaldar espinakas, kuantos kilos tomava mi madre no se, me akodro en tres legenes blankos ke eran legenes de pesah, avia tanta espinaka ke no topava de pensar kualo se va azer. Entrar al mupak era defendido no seya ke mesklemos el hamets al kasher.  El haroset por siguro se azia en kaza komo todo lo ke se komiya. No aviya nada pronto ni cateringes ni nada.  El diya de kalhamira era untar siraj i parladearlo (esto era mi echo), kemar la migita del pan, aparejar la meza de pesah ke aresiviyamos a lo manko vente i sinko almas, ir al banyo, vistir lo muevo ke mos merkaron i los kalsados de rugan. Ke pekado ke las kriaturas de oy no syenten esta emosyon porke ya tyenen todo en la mano la ora ke keren.

Mi madre tenia uzo de mandar gatos de pesah a los ke no pudian azer. I por esto, mi papa traiya a kaza 200 guevos. Kreygo ke en dinguna nasyon mas de mozos los djudyos, no egziste emplear 200 guevos en una semana!

Agora no ay ni majar la muez ni pasar la prasa por el tripito; kon un robot no esta sureyando ni 10 puntos, el haroset kon un telefon te vyene fina la puerta, la espinaka no se kere dicho si no keres penar ay paketos prontos, mundada i lavada, mas mijor ay un suri de cateringes ke te estan enbiyando todo fina kaza mezmo los chinis, pirones, kuchiyos i kucharas. No ay estrenar kalsados de rugan ni vistimyentas muevas de moed. Malorozamente kon estos todos kolaylikes no ay pransos de trenta personas.

Akeos tyempos uno si me diziya ke noche de pesah vamos a komer solos kon un tifsin enfrente el zoom diziya este peryo el meoyo. Ma vinimos a un tyempo ke no es lo ke keremos mozos si no es lo ke kere el Dyo Santo komo dize la dicha:

“Kuando el benadam aze planos, el Dyo se riye”!

Keridos ermanos malgrado todo yene meteremos la meza del seder kon kuantas personas ke ay, mos alegraremos i konsyenteremos este moed de salvasyon, azeremos loores ke estamos en kaza sanos i rezyos i estrenaremos una bluza, un fular, una charuka mueva i rogaremos ke se vaya una ora mas antes esta hazinura.

HAG PESAH KASHER SAMEAH.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ