El Ultimo Pesah en el Getto de Varsovia

Metin DELEVİ Judeo-Espanyol
7 Nisan 2021 Çarşamba

El 27 de Nissan komemoramos el Yom Hashoah ve l’Gevurah. Ma komo el 27 de Nissan este anyo esta kayendo en dia de Vyernes, este dia muy emportante se va komemorar el Djueves 8 de Avril. Komo ay unos kuantos dias solo ke salimos de Pesah, kije darvos una idea de lo ke era Pesah en los dias funestos del Nazismo.

Eramos esklavos en los Gettos de Polonya / de Hitler, Führer de Alemanya, maldicho sea su nombre / I mos kitaron de aya ... para ser asasinados o ser esklavos / yevados dezmudos debasho de la inyeve i buzes  / malgrado ke todos eramos savyos i entelijentes / kapachis de lavorar dyez vezes mas de muestras fuersas, / va ser un verdadero milagro / si de kada komunidad de djudios va kedar uno o dos, / I eyos van a kontar el sufrimyento de los djudios de Polonya / I biveran para ver la kayida de Hitler i Alemanya.

Aharon Carmi, From That Inferno, pp. 113

En Avril, el Getto estava yeno de rumores de una deportasyon serkana. Malgrado estos rumores, los djudios del Getto kontinuaron kon los aparejos de Pesah. Afilu, syertos empesaron a aparejar matza, toparon vino i alimpyaron sus platos de hamets para la fyesta. El 18 de Avril de 1943, novelas vinyeron de ke los almanes aviyan mandado la armada a Varsovia i se asperava ke el Getto iva ser likidado. Los myembros de los movimyentos de reziztensya klandestinos se metyeron en alerta maksimal. Akeya noche el Getto fue enserklado. Muncha djente ya aviyan oyido avlar de este enserklamyento grasyas a los sorvelyantes ke estavan en los tejados komo syempre.

Esta noche dingunos no durmyeron. Todo el mundo paso el tyempo aparejando los artikulos los mas nesesaryos, komo kolchas i komidas i los yevaron a los bunkeres de abrigo. Komo es en esta data, la luna estava en kinze i el syelo estava inuzualmente klaro. Aviya mas movimyento en las kazas i kayes ke de dia.

Tuvia Borzykowski, Between Tumbling Walls, p.48

 Era arba de Pesah de 1943 i aviyamos reglado todo en la kaza, i eskapimos todo los aparejos para la fyesta.  Afilu prokurimos Matza i todo lo menester. Aparejimos las kamas... El polis ke biviya en la mizma kaza syempre mos diziya todo lo ke estava pasando afuera... Akeya noche mos disho: "Devesh de saver ke el Getto esta enserklado, los Ukranyanos enserklaron el Getto. Esta noche no va ser una buena noche". El lo aviya sintido de afuera del Getto. Arekojimos todo lo de menester i mos fuimos al bunker-abrigo. Para kualo asperar? I ansi tomimos lo ke mos kedo en kaza, lo de komer ke teniyamos, todo, i abashimos al bunker. I empesimos a esperar…...

Testimonio de Shoshana Baharir, Archivo Yad Vashem, O.3 / 5469

El 19 de Avril Avril de 1943, arba de Pesah, los almanes entraron en el Getto. Tuvia Borzykowski, myembro de la Organizasyon Djudía de Lucha, mos konto el Seder en el apartamento del Rabino Eliezer Meisel:

En medyo de esta destruksyon, la meza en el sentro de la kamareta paresiya inkompativle kon lo ke estava pasando: vazos yenos de vino, la famiya asentada al dorredor, el Rabino meldando la Agada. Su lektura fue kortada despues de eksplozyones i bozes de mitralyozes; las karas de la famiya al dorredor de la meza estavan iluminados kon la luz kolorada ke veniya de los edifisyos serkanos en fuego...

Tuvia Borzykowski Between Tumbling Walls, p.57

NO MOS OLVIDAREMOS ESTA KATASTROFA, LA SHOAH, I LAVORAREMOS PARA KE NO AFITE NUNKA MAS…

Pasajes tomados, tresladados i adaptados de las ojas del sityo de Yad Vashem

Siz de yorumunuzu yapın

Tüm Yorumları Görün