20 Nisan 2021 Salı 04:59
Beymen 5-20Nisan
Beymen 5-20Nisan

“DJINDJI”, EL SIKLISTO ISRAELIANO ROEI SADAN

Süzet FRANSEZ Judeo-Espanyol 1807 görüntüleme
7 Nisan 2021 Çarşamba

El siklisto israelianao, Roei Sadan, ke lo yamavan “Djindji”, paso 5 anyos en bisikleta i izo 66.000 km. al deredor del mundo. Del anyo 2007 fista 2011, Sadan viajo en bisikleta, por las montanyas, los deziertos de 6 kontinentes i 42 payizes.

La ruta mundial empeso en el punto mas al norte de Alaska, por toda la kosta de la Amerika del Norte, del Sentral i del Sud, i despues desde la punta de Sud Afrika asta Etiopia i yego a Israel para deskansarse 2 semanas.

De muevo, kon su bisikleta viajo, empesando desde la Espanya asta Estambol, traverso la Turkiya, el Uzbekistan i el Tadjikistan, paso por la China i se fue a Australia para azer toda la kosta del kontinente. En su bisikleta hibrid de kolor blanka i blu, avia la bandiera de Israel i el se konsiderava komo el ambasador informal de su paiz. Organizava konferensias en eskolas, ambasadas, komunidades judias i sinagogas. Su propio buto era de azer la propaganda de su paiz.

En 2015, Sadan se arezvalo de una montanya abasho, en el norte de la India. Lo bueno era ke fue topado por un grupo de eskalatores, ke le dieron immediatamente oksijen i le ayudaron fista ke un helikopter lo yeve al ospital. Finalmente, lo yevaron a un ospital en Israel, onde kedo en koma durante un mez. Despues de estar 6 mezes en el ospital i resiviendo fizioterapia, Sadan torno de muevo a suvir a su kerida bisikleta. Ma Sadan no era mas el mizmo “djindji” ke era. Tenia kanserya kronika i dolores. Su memoria se avia deteriorado. El trauma estava kontinuando.

Lo mas triste es ke, una persona ke izo el torno del mundo i viajo kon su bisikleta 66.000 km, el 12 marso 2021, paso un aksidente mortal serka de su kaza. Sadan, estava en su bisikleta serka de la entrada de su Kibbutz Rosh Hanikra, en el norte de Israel, kuando un otobus  termino su vida. Izieron munchos esfuersos para reanimarlo, ma sin rezultado. Su famiya desidio de donar sus organes. El tenia 39 anyos.

“Era una persona maraviyoza i su motto de vida, era de realizar su sonyo. Tuvo una vida muy intensa komo un rock star” disho su amigo serkano.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ