22 Eylül 2021 Çarşamba 14:27
izmir marriot
izmir marriot

Muestras Memorias

Silvyo OVADYA Judeo-Espanyol 1666 görüntüleme
14 Nisan 2021 Çarşamba

   En Estanbol kreo komo todas las sivdades emportantes se organiza vendidades de kozas vyejas. Por las kartas postales, todo modo de bilyetos, de kartas geografikas vyejas, todo modo de fakturas vyejas, de fotos de famiyas, letras i un alay de kozas vyejas. I ay muncha djente ke son enteresados en estas kozas. Yo esto koleksyonando kartas postales sovre la vida Judaika Otomana i Turka ke kontiene i los Balkanes Djudio (Selanik). Tengo el suenyo de azer un livro kon estas kartas i unas kuantas fotografias sovre la Istoria de la Komunidad Djudia Otomana i Turka. Bivir i ver. Esto koleksyonando i otras kozas. Esto bushkando objetos i dokumentos sovre muestra istoria por muestro Muzeo Djudio. I de vez en kuando vesh ke un objeto mizmo una karta se vende a un montante loko. La semana pasada un koleksyonaryo merko a mas de 7.000 liras (900 USD) una kumbara muy vyeja del Ospital Or Ahayim. Todos mos akodramos de las kumbaras vedres ke teniyamos en muestras kazas. Ma esta ke fue empleada kreo 100 anyos antes i no la aviya visto fina oy.

  Si ya meldatesh el Şalom de la semana pasada en la segunda oja meti dos fotografias kon el titolo “ El Tyempo Pasado”. Las dos fotos fueron vendidas a un eskidji i el lavoro para ganar mas muncho. Topo kualo era el sujeto? I reelmente yo merki estas dos fotos. Puedeser ke no es una fortuna, ma lo ke me esta embarasando es ke los mansevos, mizmo las personas de una syerta aedad kuando se les muere los paryentes para vazyar la kaza yaman un eskidji i dan los livros ke estan en la biblioteka. Mizmo avren los albumes de fotos. Eskojen unas kuantas deyas i lo ke sovre lo dan. No kreo ke toman dosyentas o tresyentas liras para un alay de fotografias. Vos esto rogando; kuando vash a kerer dar las fotografias puedesh telefonar al Muzeo Djudio i dar detalyos sovre una grande partida de las fotografias i estas fotografias van a tomar parte en la Istoria de Muestra Komunidad. I los nombres de vuestros avuelos, de vuestros parientes van a bivir.

   La fotografia ke meti al Şalom la semana pasada era de tres mansevas en el Kolej Amerikano de Arnavutköy en 1953. I despues ke la meti en el Şalom tuvimos un alay de djente ke mos dyeron eksplikasyones sovre estas mansevas. Esto es la istoria de muestra komunidad. En 1953 avia elevos Djudios en el Kolej Amerikano. I estas mansevas komo konosiyan linguas tuvyeron el privilejyo de pueder estudyar en diferentes payises.

   Mizmo si no puedemos kada semana, el Muzeo va kontinuar a meter fotografias en el Şalom para topar eksplikasyones. Keremos enrikeser muestra istoria kon fotografias i sus eksplikasyones.

   Oy en diya es muncho mas fasil de fotografiar, spesialmente kon los telefones. Ma no es muy fasil de arekojer tantas fotografias en un lugar. Bivyendo ya vos puedesh akodrar. Ma vuestros ijos, ijas i inyetos no se van a enteresar. I esta vez no vamos a pueder topar estas fotografias ni en un eskidji, ni en una vendida de efimeras.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel