22 Eylül 2021 Çarşamba 13:31
izmir marriot
izmir marriot

Los Apartamentos istorikos d´Estanbol

Silvyo OVADYA Judeo-Espanyol 1562 görüntüleme
28 Nisan 2021 Çarşamba

Este anyo dalkavo vemos ke mizmo los tures turistikos estan trokando el modo de lavorar. Un alay de kompanyias estan organizando tures diarios. Porke mizmo kon esta Korona la djente keren pasear; azer tures mizmo de un diya. Ma komo no deven i no tyenen el koraje de azer lokuras, estan azyendo estos tures o viajes virtualmente. I el alhad pasado el Alef organizo un tur asemejante kon el famoso Mois Gabay ke es un gia bastante kapache i ke konose bastante lo ke konta. En este dia Mois mos konto durante dos oras sovre los famozos apartamentos d’Estanbol.

 Un diya dos amigos ke no eran Djudios me demandaron: "Komo empesaron los ombres a fraguar apartamentos?”. Les dishe ke no savia. Me disheron ke los primeros apartamentos fueron fraguados en el Getto de Venice en el 16en siglo. Kualo era la razon. Tenian un tereno limitado. I komo la populasion no puediya kaver kon kazas de un etaj, empesaron a fraguar kazas de tres o kuatro etajes. No se si es djusto o no ma es una razon bastante lojika. Despues de este dialogo bushki en el internet ma no reushi a topar la mizma repuesta. No topi dinguna repuesta!

 Mois kontandomos sovre estos edifisios mos konto sovre syertos apartamentos ke se topan en Galata, komo el apartamento Frej, ke se topa djusto en el sentro de Şişhane en el empesijo de la kaleja del Kal de Neve Şalom. Mi esfuegro nasio en este apartamento ma kedaron poko tyempo aya. Munchas personas kontan alavando el edifisyo porke en esta epoka morar en este apartamento era un privilejyo. El apartamento Doğan ke se topa en la kaye Serdar-ı Ekrem es kreo el primer apartamento ande teniya un tereno para pueder djugar tenis. El padre de muestro amigo Robert Schild morava en este apartamento i djugava tenis aya. (Robert Schild eskrivyo durante la konferensia, ma no lo vieron i yo les konti esto). Ya savemos ke este apartamento teniya el nombre de Boton Han. Ken era este ombre? Mair Boton i su ermano eran dos merkaderes ke azian echo de papel para sigaros. I kreo ke era un echo muy emportante ke se ganava paras. Mizmo los patrones de Barnathan Han vendiyan papel para sigaros i eran bankeres. La semana pasada aviya una vendidad en el internet i avia a lo manko 20 diferentes markas de papeles para sigaros ande la mas grande partida eran merkaderes Djudios. Mois mos avlo sovre el apartamento Barnathan. Les avli unos kuantos mezes antes para ke realizen un livro sovre el apartamemnto ke estan restorando para azer un otel. No se si los enteresa la istoria del edifisyo, ma restoraron el apartamento de una manera ekstraordinarya. El Apartamento Barnathan es un edifisyo muy grande i el ke izo esta restorasyon reusho a merkar solo el un tierso del edifisyo, ya savesh kuando uno es enteresado, todos los presyos se azen dopio. Kuando el Kamondo Han fue restorado la sosyetad ke izo la restorasyon aparejo un livro maraviyozo kontando la istoria de los Kamondos i del edifisio kon las famiyas o personas ke bivyeron. Una partida era tomado del Şalom, de una seria de artikolos eskritos por Nana Tarablus sovre los ke moraron en este edifisyo. I kije ayudar esta sosiedad para ke agan la mizma koza. Ay un livro ke fue aparejado ma no publikado. Tomi el adreso e-mail de un Barnathan ke bive en Fransia i le eskrivi. Se entereso i despues me embiyo a lo manko 50 ojas sovre la istoria de su famiya.

 Dos mezes antes sigiendo el filmo de Bella Eskenazi mos estava kontando ke moraron un syerto tyempo en el Apartamento Barnathan despues ke se muryo su padre. Deve de ser ke era un apartamento mas barato. Bella esta bivyendo oy en diya. Ma no en Estanbol. Kreo ke es posivle de topar personas ke bivyeron aya. Mizmo puedeser sus ijos o inyetos. Mois mos konto dos oras enteras sovre 20 o 30 edifisios. I yo reushi a kontarvos un alay de kozas solo sovre tres o kuatro edifisios. Ke no vos pareska ke vos va kontar i la semana ke vyene sovre estos apartamentos.

Kero felisitar Mois Gabay i el Club Alef porke mas de 200 personas asistyeron a un viyaje (virtual) asemejante.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel