20 Haziran 2021 Pazar 00:36
Mett Hotel
Mett Hotel

EL AKSIDENTE DE MERON

Eliz GATENYO Judeo-Espanyol 871 görüntüleme
5 Mayıs 2021 Çarşamba

El aksidente ke akontesyo en Meron (Israel), ande uvo 44 piedritas i 150 firridos, mos izo grande pena. Sigun las informasyones ke resivimos, la tribuna ande se suvyeron muncha djente por la selebrasyon de Lag Baomer, se chokteyo del pezgo porke la tribuna no era rezya i todos los ke estavan ensima estavan saltando, kantando i baylando. Komo ya savesh, Lag Baomer es el 33en diya de la peryoda de Omer. En el primer siglo, 24 mil elevos de Ribi Akiva, muryeron en esta peryoda de una epidemiya. I mirakulozamente la epidemiya se eskapo akel diya. Siguro todos estavan muy alegres. Las bodas i las fiestas ampesaron de muevo.

Mi mama en estos diyas no kuziya ni brodava, sovre todo las noches. Diziya es sefira. Porke, ke mal mos kere, las mujeres de akel tiempo no abastesiyan de kuzir mortajas. Lavoravan de diya i de noche.

Lag Baomer es en mizmo tiempo el diya de la muerte de Shimon Bar Yohay. Asigun su testamento, no se aze dolyo en este diya. A la kontra se aze alegriyas, se kanta i se bayla al doredor de las lumbres ke las yaman Medura.

Esto dicho, kero mensyonar otra koza. Malorozamente en todas las sosyetas egziste grupos de personas ke kuando es kestion de tradisyones, de fiyestas, de rankontros de spor o de manifestasyones politikas, se olvidan de todo. No pensan mas de lo ke tienen en el meoyo. La dezgrasya ke vos konti es un egzemplo entre munchos otros. No es ke keren fiestar un evenimyento? No azen atansyon a nada mas. Enriva de kualo estan manifestando, no miran lo ke ay debasho. Saltan, gritan, baylan i despues, el rezultado es muertos, firridos, yoros i tristeza. En Israel deklararon dolyo jeneral en la sivdad entera el diya de Alhad 2 de Mayo 2021.

La mizma koza es lo ke estamos biviendo en estos diyas de la pandemiya. No se por kualo ampesar. Djente ke no kere meter maska, los ke se arekojen en las kazas, los ke son kontra las vaksinas, los ke kale ke se keden en karantina ke salen a las kayes. Malgrado ke los doktores estan kontando en las tv’s o en las gazetas las sufriyensas de los hazinos en los ospitales i las mortalidades ke pujan de diya en diya. Les parese ke kedar en kaza es una punisyon. Ma no se renden kuento ke kedar en kaza es para guadrarmos i protejarmos de la hazinura maldicha.

Esto no es el primer aksidente en Meron. En  el anyo 1911 uvo la mizma dezgrasya en la mizma epoka en el mizmo lugar. En fiestando Lag Baomer, en Meron se aviyan arekojido kaje 10.000 ultra relijiozos. Se rompyo la kandjela de la plasa ande estavan arekojidos, uvo un kaos i se muryeron i se firieron muncha djente. El governador (kaymakam) Otomano de akel tiempo era Hüseyin Efendi. El se okupo del kavzo, izo arekojer los muertos i mando los firridos a los ospitales.

Kero eskapar en dizyendo ke la disiplina es una de las virtudes muy valutozas de la umanita.   

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR