“El izo briyar la elegansa franseza en el mundo” E. Macron
El dizenyador simpatiko Israeliano ke rebivio la marka Lanvin, murio de Corona el 24 avril 2021. Nasio en Casablanca, Marocco, en una famiya judia ke avia emigrado a Israel kuando el tenia diez anyos. Su tendensia por los artes, lo oriento a estudiar en el Shenkar College of Engeneering and Design en Israel. En 1989, se fue a Nueva York para lavorar kon Geoffrey Beene (Samuel Albert Bozeman). Beene era un dizenyador ke avia ganado fama kon sus fostanes simples i konfortables. Despues, Elbaz paso a Paris ande Guy Laroche. Ma el grande salto de su vida, fue de ser el direktor kreativo de Yves Saint Laurent i de ayi paso, para ser dirijente de la mas vieja kaza de moda de Fransia, Lanvin, fundada en 1889, durante 14 anyos.
Elbaz era uno de los mas apresiados ombres de la moda. Afable, serkano i divertido, el era un jenio. Es el ke reinvento el glamor, la feminidad i dio un muevo orizente a la moda. Tenia un senso partikular de lukso i reushia a dar una esensia a su ovra. El savia ganar los korasones de las mujeres. Sus kreasiones, avia echo de Lanvin, la etiketa la mas dezeada de todas las estreyas de Hollywood. En 2012, Elbaz izo un livro de 3000 fotografias ke dokumentan una dekada de Lanvin. En 2013, el kolaboro kon Lancome para krear una kozmetika de edision limitada “Lancome Show” by Albert Elbaz. En 2014 resivio “Honoris Causa” de la parte del Royal College of Art of London. En 2015, Elbaz abandono la kaza Lanvin i empeso un muevo projekto yamado “AZ FACTORY”. En 2016, el resivio “La Legion d’Honeur de Fransia” i la ministra de kultura, Audrey Azolay le entrego la medalia. En 2017, kollaboro kon la marka de parfum Frederic Malle, ke salio kon el nombre de “Superstitious” i en 2019 anunsio ke va lavorar kon la marka de kuero italiana Tod’s.
Este ombre talentuozo, kon vizion i kon kualidades eksepsionales, lucho tres semanas kontra el Covid, sin reushidad. El era la luz ke avia rompido todas las konvensiones de la moda. Su slogan era “Smart fashion that cares for everybody”.
