20 Haziran 2021 Pazar 00:50
Mett Hotel
Mett Hotel

La alegria del empesijo del enverano

Şeli GAON Judeo-Espanyol 660 görüntüleme Sesli Dinle
9 Haziran 2021 Çarşamba

 

          El tyempo ya se kayento, i ya es la sezon de ir a las izlas, a los viyajes ke ay un anyo i medyo a kavza de este virus “Corona” no mos estamos puedyendo meneyar.

          El enverano es una sezon ke se bive kon muncho gusto i alegria despues de la primavera. Los dias se alargan, las noches se akurtan, la natura es yena de munchas kolores diferentes, se oye kantar los pasharos, las yervas se engrandesen, las flores enfloresen en los kampos, i las personas se syenten mas orozos de todo modo de evenemento, porke esta sezon plaze a todos. Munchos de mozotros  ke se kedan en la sivdad, se van a la mar, todo el tyempo pasa afuera, en las kayes...

          Se ampesa a vender las frutas del enverano ke son; las serezas, uvas, kayisis, avramilas, moras i otras.

          El enverano arekayenta la persona. La natura se aribive, la kolor de las vedruras i del syelo, la mar, todo el entorno yeno de kolores bivas, ke alegran a la persona i se deviene mas positivos, i mas optimistos.

          Veramente estamos bivyendo en un pais maraviyozo yeno de ermozuras natural, ma no savemos la valor de esta rikeza.

          Las personas pueden estar orozos kon chikos plazeres en la vida.  Esto depende del karakter de la persona. Fuyir de la sivdad kanseryoza i muy reboltoneyoza i ir a pasar un dia diferente en un kampo, azer piknik kon los amigos, es para mozotros un grande trokamyento. Tener amigos buenos es un trezoro en la vida.

Yo penso ke partajar todo modo de evenementos kon los ke mos sintimos serkanos, komo la famiya, ermanos, u amigos mos fasilita las difikultades de la vida.

Tener en el entorno munchas personas komo amigos, no kere dizir veramente ke todos son sinseros, i la amistad ke tyenen es vinido del interyor.

          El amigo prinsipal es el ke syente todos los evenementos orozos komo los akontesimyentos negros ke pueden trokar la vida de la persona en un punto, es el ke da moral al den frente, es el ke syente un amor, una fidelita sin fin i sin selo, i una sensibilidad para pueder eksplikar sus sentimyentos ke vyenen de aryento de su korason sin ideas malas.

          El amigo sinsero es el ke da apoyo en los dias de difikultades al den frente, i esta atitud, este komporto aribive a la persona. Yo penso ke  si una persona tyene dos u tres amigos ke puede veramente partajar todo lo ke kere es una grande valor. Kerer byen komo ermano al den frente es un efekto muy emportante, i da una moralita a la persona.

          Todos se pueden atristar a la pena, a la ansya de un amigo, esto es lo mas fasil. Lo mas emportante es de gustarse i de alegrarse a la reushita de un amigo. Este fakto mostra el karakter rezyo de la persona.

          La amistad i el amigable sinsero es una fuente de agua en el dezierto.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR