Enveranada buena i klara

Silvyo OVADYA Judeo-Espanyol
16 Haziran 2021 Çarşamba

Va empesar mi artikolo eskrivyendo unas kuantas palavras sovre mi artikolo publikado en El Amaneser. Si lo meldatesh eskrivi un artikolo sovre tres kartas postales / fotografias. I entre eyas una era sovre el Monte de Yusha (Yeushua) ke se topa djusto en la salida del Bosfor verso la Mar Preta en la parte Asiatika. Si meldash atentivamente lo ke eskrivi,  esto dizyendo ke todo esto es sovre una lejenda. Muestro Hahambashi İzak Haleva me telefono immediatamente dizyendome ke esto kontando bavajadas i esto todo no es djusto. En la Biblia (i me embiyo lo ke devia de meldar) puedemos meldar ke el Profeta Yeushua gerreyo kon Moshe Rabenu endjuntos i  izo la konkista de Yericho /Eriha. Kuando se murio a los 110 anyos fue enterrado en el monte de Gaash. Estamos avlando de 3.300 anyos d’atras. No se dainda si me esto yerrado porke tengo siertos livros ande esto esta kontado! Vos kero demandar de ke empleamos la palavra “En la Usha" i kualo es su sinyifikasion?

   Kuando me telefono el Hahambashi estava en Çeşme. Este anyo tomi un diya de vakansas (diya de vyernes) i kon el muevo kamino ke es bastante karo me fui en sinko oras i media a Çeşme. El tiempo i la mar estavan una maraviya. El Hahambashi es uno de los raros ke melda todos los artikolos istorikos ke esto eskrivyendo. I kada vez ke tengo de menester de siertas eksplikasyones es el primer ke devo de bushkar i demandar!

   No vos va kontar komo entri a la mar i komo me kemi en un diya kon el sol ke avia. Ma para el turismo organisaron un sistem kon el kual tenesh el derecho de viajar si vos kedatesh en un otel. I kon un papel ke fue preparado por la direksion del otel, pudimos tornar a Istanbul en kuatro oras i medya dia de alhad.  

   Ke no vos pareska ke todas las kalejas i los kaminos estavan vaziyos. Aviya reelmente una djentorya en kada lugar. Empesimos kon Çeşme i kreo ke todo esto no era diferente en Bodrum o Antalya.

   Oy (Lunes) estamos muy kontentes porke por la primera vez serka de 750.000 personas fueron vaksinadas kontra la Corona en un dia. Si muestro payis va kontinuar kon esta rapidez (si topan los vaksenes ke nesesitan) de vaksinar, vamos a pasar a una vida muncho mas normal verso la fin del mez de djulyo. Kada dia estan abashando la edad de los ke se deven de vaksinar. Oy alkansaron a los 40.

   Kualo afita en las islas? Malorozamente la mar esta kon las Bavas. I todos estan pensando lo ke van azer para pueder entrar a la mar. Mizmo ayer una amiga disho ke kale azer un program kada fin de semana para no estar en Estanbol. No se lo ke es djusto ma ya me ambezi ke la natura es garezlia. Si no vos komportash komo lo devesh un diya la natura se venga de mozotros. Komo puedesh pensar ke una de las mas  grandes fabrikas en la  industria de fertilizantes la noche esta echando a la mar todas sus susyedades. I no se komo afito un diya despues, esta fabrika fue serrada asta ke va azer la purifikasion de sus susyedades.

  Es reelmente muy emportante para mozotros de pueder ver la mar de Marmara limpia a lo manko komo era el anyo pasado. Enveranada buena i klara…

Siz de yorumunuzu yapın

Tüm Yorumları Görün