DESPUES DE MI, SI SE ESTRUYE EL MUNDO, NO ME IMPORTA

Anet PASE Judeo-Espanyol
23 Haziran 2021 Çarşamba

En vezes me esta vinyendo muy difisil de entender los  kavzos. Antes un mes entrimos en una epoka muy difisil. Todo serrado, todos en kaza, las botikas serradas, las eskolas serradas. Los ojos en la televizyon, para sintir kada noche los haberes terrivle de la pandemiya. Los shifros estavan bien altos. Afilu de muertos i de los hazinos bien pezgados. Aviya munchas personas enfektadas. Estavamos tomando haberes negros de muy serkanos, vizinos, amigos ke estavan sufriyendo kon kayentura o kon una tos dezgrasyada.

Aryento de un mes, despues de la serradura, los shifros empesaron a abashar buen karar. Parvinyeron a vaksinar munchas personas.

Despues de una semana de la serradura, el primer Shabat ke vino, avryeron todas las botikas, las eskolas, los kafes. La djente komo un mabul salyeron a las kayes, a kaminar. Envezes por menester, envezes solo para tomar aver, o para bever un kafiko kon la djente ke aviya muncho tiempo no se viyan.

Ama komo salir? Antes de la pandemiya todos estavan dizyendo ke la vida no se va azer mas komo lo savemos. Se va trokar. Lo ke vimos todos, es ke no se troko nada. Esta todo lo mizmo. Me parese ke todo se olvido i se va olvidar. En las kayes las maskas ya no se estan vistyendo, ya estan debasho las narizes. Los kafes estan yenos a parladar. La djente, lo mas los mansevos estan naris kon naris charlando. Los vapores, los metros, los otobuses yenos solo son los defendidos los de mas de 65. I los de abasho de 18.

Oy el 21 de junio, ya se alevanto todas las prohibisiones. Ya es verdad ke los shifros abasharon. Ama oy en diya Covid-19 esta kon mozos i va bivir dayinda kon mozos. Kale azer atansiyon, kada persona kon su responsabilidad suya, afilu ke no se deranja muy muncho de la enfeksiyon, kale pensar al los ke se derenjan o puedeser ke no vana pueder tomar reflo kon repozo.

No kale, dizir yo ya me vaksini, esto libre. A mi ke me sale! Va salir, va kaminar. No se save si la libertad en supito es djusto. El Dyo ke mos guadre de mal. Lo ke esto pensando es, ke no es djusto esto penseryo: despues de mi, si se estruye el mundo, no me importa!

Siz de yorumunuzu yapın

Tüm Yorumları Görün