SUPERSTISYONES

1- Eskupir tres vezes

En dizyendo tres vezes “pu pu pu” komo eskupyendo, pensan ke es una reaksyon para buenas o negras kozas ke afitan. Este ritual se empleya kuando se ve un bebe ermozo o se oye un haber bueno. Mizmo Maimonides diziya ke la saliva tiene una valor pozitiva. Puede ser ke esta superstisyon Judiya  viene del tiempo de Yeoshua (Kristo). En la bibliya avlan del poder de su saliva. Dizen ke le trusheron una persona sodra i muda. Kuando el, lo eskupio i miro a los sielos, pishin ampeso a oyir i a avlar el ombre. Otro miraklo de la saliva de Yeoshua es ke kuando eskupio a la tierra izo un lodo i le frego a los ojos de un siego,  el siego ampeso a ver. Siguro esto todo son leyendas.

2- Mashkar ilo

Un uzo, es de no kuzir un boton o una koza arazgada ensima de una persona.  Le dan un pedasiko de ilo para ke mashke.  Si kuzimos ensima de una persona, dizimos: Ensima de ken esto kuzyendo? Ensima de la reyna de Fransya. Eya ke tenga mis males i yo tenere su bien. Dizen esto para ke no le echen aftira.

3- Travar la oreja en sarnudando

Una kostumbre judiya, es de travar la oreja despues de sarnudar, si se  avla  de una hazinura o de uno ke no bive mas. En mizmo tiempo, los ke ven sarnudar a uno, dizen “Bivas, kreskas, enfloreskas i engrandeskas”.

4- Sarnudar en lo ke se avla una verdad

Antes kreyiyan ke sarnudar viniya de una eksplozyon en el meoyo. Ma despues toparon ke era una iritasyon de aryento la naris. Una kreyensya tradisyonala es ke si se sarnuda en lo ke se avla de un dezeo o de un akontesimyento, se dize “Bivas ke es verdad”.

5- Serrar livros ke se desharon aviertos

En las sinagogas i en los salones de estudios talmudikos, se serran los livros, ke kedaron aviertos.  Se pensava en el tiempo medieval,  ke  los satanes ivan a vinir a meldar estas “saviduryas santas” para uzarlas para sus fuersas negras.

6- Meter sal en un kanton de la kaza o en las aldikeras

Se saviya ke los guerkos topavan las kazas vaziyas para entrar i bivir aya. Kuando viniya un morador muevo, no los deshavan repozados. Alora ya se saviya, ke la sal  teniya un poder  kontra los  spiritos negros. Por esto se mete sal a los kantones de las kazas antes de enstalarse. Tanbien la sal es bueno kontra el ojo malo. Kuando se merka una vistimienta mueva se mete un poko de sal en las aldikeras para ke no toke nazar.

7- Meter  alfinete al vistido antes de salir a viaje

Se mete una alfinete a una parte del vistido. Se kreye ke el metal tiene una fuersa protektora. Mos proteja de las miradas negras en reflektandolas para enfrente. Otra eksplikasyon es ke en ebreo el biervo fierro kere dizir “Barzel”. I este  biervo es kompozada de los nombres de las kuatro madres de Israel: Bilhah, Rachel, Zilpah i Leah) ke kreyemos ke mos van a guadrar.

8- Aharvar  tavla

Malgrado ke esta uzansa no es uzo Judio, es empleyada muy frekuente ande mozotros. Es kedado del tiempo panteisto. Akel tiempo teniyan Diozes gravadas en las tavlas. I al puevlo les paresiya ke tokar estos Dioses va trayer buena shans.