UNA NOVELA ALEGRE

Dora NİYEGO Judeo-Espanyol
30 Haziran 2021 Çarşamba

En el anyo 2006, un mansevo de 19 anyos del norte de Israel, Gilad Shalit, fue fuyido por Hamas en una ataka. Dos soldados israelyanos muryeron en esta ataka. Shalit, ferrido, fue arastrado a traves de un tunel subterrano asta Gaza.

Las primeras tentativas de la armada israelyana para salvarlo no fueron reushidas, i por esta razon, la madre i el padre de Shalid, Aviva i Noam empesaron a azer esforsos para salvar a sus ijo. En primero kaminaron dodje diyas empesando de sus kazal fina Yerushalayim. Despues metieron una tenta afuera de la kaza del primer ministro. I no se meneyaron de aya. 
Munchos israelyanos empesaron a kedarsen en esta tenta kon eyos. En el pais entero, israelyanos empesaron a azer manifestasyones. Los judyos del mundo entero empesaron a azer mitinges en sus payises. Los aktivistos apegaron la kara de Shalit en los panos de publisidades, enkolgaron karteles enriva de kualas eskrivyeron "Gilad esta bivo" i apegaron kartones kon la foto del soldado en el payis entero. 

En un payis ande el servisyo militaryo es obligatoryo para los sivdadinos judyos, no es egzadjerado ke la djente ensisten para salvar un soldado. Este soldado puediya ser sus padre, sus ermano, sus ijo, ke lo desharon a pudrirse en una foya en Gazza ...

Los katorze milyones de judyos del mundo, se sintyeron komo si Gilad Shalit fuera un myembro de sus famiya. Esto es la unika razon deke en oktobre de 2011, Israel libero 1.027 prizonyeros a kambyo de Gilad Shamit.

Tambyen esto demostro ke el estado-nasyon del puevlo judyo de vez en kuando fonksyona komo una famiya. La razon por la kual Gilad tuvo ke ser salvado, a kualsiker presyo, fue porke Gilad era paryente de todos los judyos.

Kuando se supo el diya de San Valentin ke Gilad le aviya propozado kazamyento a su amiga, Nitzan Shabat, la alegriya tambyen fue familyar, komo si un ermano ke aviya  enganyado la muerte, i ke no solo sovrebivyo, ma tambyen tuvo la oportunidad de kazarse.

Shalit i Nitzan Shabat, tuvyeron una relasyon durante unos kuantos anyos, i unos kuantos diyas antes, se kazaron en una seremoniya en Emek Hefer, en el sentro de Israel.

Las solas personas envitadas fueron paryentes i amigos serkanos. Les estamos ogurando felisitad a los muevos kazados.

Siz de yorumunuzu yapın

Tüm Yorumları Görün