Un Sentro de Bushkidades en el Muzeo Djudio

Silvyo OVADYA Judeo-Espanyol
30 Haziran 2021 Çarşamba

  Oy en dia por el ke kere azer syertas bushkedades sovre la Komunidad Djudia del Imperio Otomano o de la Turkiya no es posivle de topar todo lo ke bushkan en un Sentro uniko. Es djusto ke se puede topar munchos dokumentos o gazetas ke fueron publikadas en el Imperio Otomano o la Turkiya en los arshivos del Şalom o del Gran Rabinato. El tyempo esta pasando i syertas personas ke tyenen una syerta aedad keren ke sus bushkedades o los livros ke se topen en sus biblioteka sean en un lugar (Sentro de Bushkidades) siguros i los ke tyenen de menester vengan i arekojgan todas las konosensias ke tyenen de menester. En el edifisio del Muzeo Djudio de Turkiya estamos planifikando para formar un Sentro ande se va topar buen karar de dokumentos i livros i en el Sentro vamos a ayudar a los ke keren azer bushkedades.

  En el Muzeo Djudio estamos resivyendo i estamos merkando syertos livros ande los sujetos enteresa el Djudaismo Otomano i Turko. Kada anyo en muestro payis se publikan munchos livros sovre este sujeto i en las universidades turkas se azen munchos lavoros sientifikos komo tezes de master o de doktorato. Esto es mas de syen kada anyo. Ya savemos ke oy en dia los kompyuteres son los elementos los mas emportantes en los arshivas. Deke no tener un kompyuter ande se puede topar todo modo de tezes. No se si en el empesijo vamos a poder dijitalizar miles de livros. Ma ya se ke vamos a dar lugar a los miles de livros ke se topan en el edifisio del Gran Rabinato (ke troko de lugar). Un anyo antes empesimos a klasifikar estos livros kon syertos profesionales.  Reelmente es un echo ke no es muy fasil. I komo no tenemos munchas personas ke konosen el Ebreo i el Judeo-Espanyol en letras Rashi el lavoro va ser mas difisil.  Tenemos de menester de syertos profesionales ke se van okupar de este sentro. Kreo ke los estudios en este kampo va ser muy emportante para pueder lavorar en este sentro.

  Los anyos dalkavo syertas personas mos dyeron los livros de las bibliotekas de sus paryentes. Es un echo muy difisil porke en la mayoria ay muy pokos livros ke mos enteresan. La mas grande partida son livros en turko, en fransez i en inglez i los sujetos de estos livros no mos enteresa. I malorozamente no es muy kolay de pueder vender estos livros. Ya se ke ay munchas vendidades ke se realizan en el internet ma la valor de estos livros no son muy altos i si son romansos en fransez o en ingles no se pueden vender.

   Si vamos a reushir a resivir  syertos fondos para realizar este Sentro vamos a lavorar mas profesionalmente. Empesando de oy estamos prontos a sintir todo modo de personas ke se entyenden de estos sujetos. Espero ke este Sentro va estar pronto en el mez de Septembre de este anyo.

Siz de yorumunuzu yapın

Tüm Yorumları Görün