El Muzeo de las Izlas de Prénses

Silvyo OVADYA Judeo-Espanyol
14 Temmuz 2021 Çarşamba

  Ya konosesh las izlas ke se topan a una ora de Estanbol; egziste i otras ma las mas emportantes son la Isla de Prinkipo (Büyükada); Halki (Heybeli); Antigoni (Burgaz) i Proti (Kınalı). Desparte de estas izlas se topa otras kuatro deas i solo una es morada. En la Izla de Prinkipo se topa un muzeo; “El Muzeo de la Sivdad” ke funksiona los onze anyos dalkavo. Se topa en la partida yamada Aya Nikola, djusto al lado del Yıldırımspor ke es un Klub Djudio. I es uno de los primeros muzeos de la sivdad (Kent Müzesi) de muestro payis. Es dirijida por una fondasion: La Fundasion de las Islas. Asta el anyo pasado no era muy kolay de ir al Muzeo porke se topava bastante leshos del sentro de la Isla. Ma el anyo pasado despues ke retiraron los faytones i estamos sirkulando kon arabas (taksis) o otobuses ke fonksyonan kon elektrisita, ay dos linyas ande los otobuses se kedan djusto delantre del muzeo.

  Empesando de la epoka ke se avrio, la fundasion tomo el dover de editar livros sovre las izlas. Todo modo de livros. I kreo ke reusho asta oy de publikar serka de 50 livros. Puedesh topar livros sovre la istoria de las izlas, rekuerdos sovre la vida en las izlas, rekuerdos de diferentes viyajeros, syertas biyografias sovre personas ke bivyeron en las izlas, sovre la arkitektura de los edifisios de las izlas i todo modo de sujetos. Estos livros se venden en el Sitio de Internet del Muzeo de las Islas. Mizmo publikaron livros ke tyenen la valor de una ansiklopedia. En estos livros se puede topar todo modo de detalyos sovre las izlas; de los tipos de pishkados asta los tipos de las yervas i de los arvoles. Ay mujeres ke konosen muy bien las yervas ke kresen en las izlas i las arekojen para gizar syertas komidas. Ay dos mezes ke les dishe ke se puede publikar un livro sovre las yervas i las komidas ke se pueden gizar kon las yervas de las Islas. Ma malorozamente no fue un tyempo djusto. Vamos a realizar este projekto despues del mez de septembre.

  Oy vos kero avlar sovre dos livros publikados por esta fundasion. El primero es el livro de Viktor Albukrek ke es un amigo muy valoroso mizmo si tenemos mas de vente anyos de diferensia. El titolo de su livro es: “Un syerto tyempo Büyükada/Bir zamanlar Büyükada; Rekuerdos de los anyos 1931-1961/1931-1961 Anıları”. Oy en diya no es posivle de topar este livro porke se eskapo. Estan preparando la kuatren o la sinken edision. Kreo ke tengo un rolo emportante en la publikasion de este livro. Kuando Viktor empeso a eskrivir syertos rekuerdos ke eran reelmente muy enteresantes, le dishe ke devia de eskrivir un livro i se izo eskrivano. Oy en diya Viktor Albukrek es mizmo una autoritad sovre este sujeto i munchos jurnalistos azen reportajes kon Viktor. En la presentasion de su livro esta mensionando komo le demandi de eskrivir unos kuantos biervos sovre sus rekuerdos.

  El sigundo livro ke devo de mensionar es el livro de Robert Schild, ke fue publikado el mez pasado. Robert ay anyos ke mora en la isla de Antigoni. Lo merki oy i no es posivle de avlar sovre lo ke eskrivyo ma el titolo del livro es: “Un Muzeo Bivo Etnografiko: La Izla de Antigoni/Canlı bir Etnografik Müze: Burgazadası”. En este livro Schild esta refletando los 82 reportajes ke izo kon diferentes Burgazlis. 82 personas de diferentes raises, i syertos de diferentes relijiones. Kreo ke fue un lavoro muy reushido. Ya puedesh merkar este livro del Sitio Internet del Muzeo.

 

Siz de yorumunuzu yapın

Tüm Yorumları Görün