SAVER ES BUENO J E S S I C A M E I R

Judeo-Espanyol
28 Temmuz 2021 Çarşamba

JESSICA es una mujer kumplida, una de las 4 primeras mujeres Djudiyas i una de los 15 Djudios ke salieron afuera de muestro mundo para pasear en el Espasyo. Su padre, un Djudyo Sefaradi Mizrahi ke emigro kon un grupo de ijikos Djudyos de Irak a Israel en el anyo 1930,  estudyo la medisina i se izo doktor. Despues de servir en la gerra de independensya de 1948, desidyo de ir a la Sueda ande enkontro la madre de Jessica i los dos se enstalaron en los Estados Unidos, en la sivdad de Maine, ande nasyo Jessica.

Jessica Meir se metyo en la kavesa de  ser astronota desde ke teniya 5 anyos.  Despues ke eskapo la eskuela medyana, se fue al kampamento del espasyo, i kuando estava en la Universita  Brown, tuvo un entrenamiento en el Sentro Kennedy de Espasyo. Tuvo de pasar tres etapas para ser akseptada al program muy selektivo de la NASA i tuvo de lavorar 2 anyos duros para tener la otorizasyon de partisipar en una misyon de la NASA.

En esta primera misyon, Jessica salyo al espasyo kon el famozo kozmonot ruso, Oleg Skripochka i kon Hazza Ali Almansoori, el primer astronoto de los Emiratos. Su misyon era de estudiar i entender a través de eksperyensas teknikas de rango medikal, fizyolojiko i kimiko, komo el umano va ser afektado en el espasyo. "No so una persona relijyoza", dize Jessica Meir, "ama mi pasado kultural Djudyo, djugo un gran rolo en mi kultura i mas i mas en mis tradisyones i esto despues de mi Bat-Mitzva."

La kustumbre para los astronotes es de yevar rekuerdos  a la estasyon del espasyo. Jessica, komo rekuerdos, se yevo la bandyera de Israel i un par de kalsas brodadas kon Menoras. En  primero empeso a ser asistante de la profesora de anastezia en la eskola medikal de Harvard. Izo su doktorado en los estudyos de fizyolojiya komparativa en la Universita British Columbia. En el anyo 2013, fue seleksyonada por la NASA komo parte del ekipo “grupo 21” i en Oktubre 2019, salyo al espasyo kon "Soyuz MS-15" al lado de Kristina Koch, otra astronota amerikana.  Así, esta ekspedisyon fue la primera ande solo 2 mujeres kaminaron (!!!) en el espasyo para instalar una unita de enerjiya  afuera de la “Estasyon Espasyal”. Un lavoro ke duro 7 oras i 17 minutos. Ken save ke emosyon tuvieron i ken save si las 7 oras no les paresyo 7 anyos. Klaro estamos pensando komo si el TYEMPO EN EL ESPASYO PUEDIYA SER EL MIZMO TYEMPO DEL MUNDO. En esta ekspedisyon, Jessica no se olvido de embiyar un mesaj de felisitasyon de  Hanuka a Israel, kon la foto de Israel tomada del espasyo i la foto de sus kalsas brodadas de la Menora.

 Jessica torno al mundo el anyo pasado 2020, despues de pasar 205 diyas en el espasyo. Kuando por fin abasho a la tierra, disho: “Aki me siento mas aizlada ke en el espasyo, savyendo ke el mundo esta debasho de mis pyes. Aya ariva, estamos tan okupadas, ke no pensamos ke estamos aizladas.”

Avlando de Jessica Meir, no mos olvidaremos de komemorar Ilan Ramon ke fue un pilot kolonel en la TSAHAL, antes de ser el primer astronoto Israelí. Partisipo a la ekspedisyon de Columbiya en el anyo 2003, ke malorozamente  no reusho a abashar i muryeron todos los 7 de este ekipo, el siendo el mas aedado porke ya teniya 48 anyos. "No so relijyozo", estava dizyendo, "ama kreyo ke aki en el syelo, esto reprezentando a todos los Djudyos del  mundo komo a todo el puevlo de Israel".  Así el fue la primera persona en el syelo a komer “Kasher” i observar el diya de “Shabat”. 

Siempre a delantre i de mijor a mijor.

(Inspirado de Josefin Dolsten i Wikipedia)

 ILAN RAMON

 

 

 

Siz de yorumunuzu yapın

Tüm Yorumları Görün