23 Ekim 2021 Cumartesi 23:43
Op Dr Mücteba Gündüz

No, los djudios no dirijan, no reynan i no governan el mundo

Metin DELEVİ Judeo-Espanyol 2085 görüntüleme
25 Ağustos 2021 Çarşamba

El Talmud mos dize ke para ser kreivle, toda buena mintira deve tener a lo manko un poko de verdad en su esensiya. Esto no es valavle kuando se trata de los difamatorios "Protokolos de los Ansianos de Sion" (The Protocols of the Elders of Zion), una konseja, una istorya totalmente fabrikada sovre el tema de los líderes djudios ke se arrekojeron para planifikar el kontrol del mundo.

Es difisil de imajinar un texto mas desgustante i skandalozo, deskrivyendo todo un puevlo kon unas mintiras absolutamente fabrikadas. Lo ke es igualmente mas skandalozo es ke komo tanta djente se kreyeron en esta falsifikasyon i lo defendyeron i lo propajaron komo ke es una verdad primordial. Trajikamente, munchos atribuyen la grande parte de este teksto de tener su orijin a un djudio, un Jacob Brafman. Brafman tuvo una disputa kon el "kahal" semi-otonomo, el komite de lideres djudios ke governan una komunidad lokal. El pleto kon los lideres djudios lokales lo izo desidir a konvertirse a la relijyon ortodoksa Rusa i a eskrivir varias letras difamatoryas ke promoviyan la ideya paranoika de ke los Djudios se arrekojiyan en sekreto para bozdeyar i impeder los negosyos rusos, meter mano i apatronarsen de propiedades i ansi poko a poko ganar el poder en la Rusia. En 1868, Brafman publiko "Las ermandades djudias lokales i universales" i "El livro del Kahal" en 1869.

"Los Protokolos" pretende dokumentar, las aktas de la reunion de, komo los yama Brafman, los "Ansianos de Sion" ke estavan konspirando para kontrolar el mundo entero.

“Los Protokolos de los Ansianos de Sion” se publikaron por primera vez en seriya en el jurnal Znamya, periyodiko de San Petersburg, a partir del numero del 26 de Agosto de 1903, (esto es la razon porke esto tratando este sujeto esta semana) data ke korresponde al 16 de Elul. Kuatro mezes antes, Pavel Aleksandrowitch Krushevan, el editor del jurnal Znamya, aviya echado las primeras senteyas de los pogromes de Kishinev kontra los Djudios. Los artikolos bazados sovre el infamozo Protokolos se propajaron en el mundo entero. I el mas famozo era el "Dearborn Independent" de Henry Ford, ke empeso a publikarlo a partir del 22 de Mayo de 1920. Ford, mas despues, fue el sponsor de la publikasyon de 500.000 kopyas de esta falsifikasyon. Ma, en 1927, achakes de las fuertes presyones, Ford publiko una retraksyon, aunke, devemos de saver ke el fue uno de los primeros admiradores de la Almanya Nazi i de Hitler.

El 29 de Mayo de 1933, el myembro del Kongreso Amerikano, Louis T. McFadden,  meldo las akuzasyones kontenidos en los Protokolos en el Kongreso. I esto entro a la istorya komo el primer diskorso antisemita en el Kongreso.

Es de saver ke se provo ke el manadero orijinal de la falsifikasyon konsiste en “Dialogo en el Enferno entre Machiavelli i Montesquieu “ (Dialogue aux Enfers entre Machiavel et Montesquieu), un satiro politiko de 1864 de Maurice Joly, i un kapitulo de “Biarritz”, una novela de 1868 del novelisto alman antisemito Hermann Goedsche, ke fue traduizido al Ruso en 1872.

Malgrado ke se provo las falsifikasyones, oy en dia, estas mintiras estan aparesyendo dainda en el mundo entero.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR