ROSH ASHANA

Şeli GAON Judeo-Espanyol
9 Eylül 2021 Perşembe

Kada anyada mueva es la puerta de un presipyo, de un empesijo. Para las personas, el anyo muevo es la sinyifikasyon de las muevas emosyones, muevos dezeos, muevos akonsintimyentos.

Dingunos de mozotros no semos perfektos. Todos penamos kontinualmente para ser una persona mas buena. Unos de mozotros keren aflakarsen, otros no keren mas fumar, u el buto de otros es avansar moneda. Ken de mozotros keren ser mas pasensyozos, otros mas ordenados, otros tolerentes...

Bueno, para empesar a trokar, deke eskojemos los primeros dias de la anyada mueva, i non los dias ultimos de la anyada pasada?

Las personas tyenen una abitud de tomar muevas desizyones en entrando a una anyada mueva i kale desidar de kontinuar esta atitud buena durante el anyo.

Por egzempyo, para rezolver todo en un punto, se prefera de empesar kon pasos chikos. Kale ser realistos. Puedemos tomar una desizyon por egzempyo, de azer mas munchos egzersizyos, para pueder aflakar i konservar la sanedad. Para koryer un kilometro u kaminar kada demanyana ke es difisil en invyerno kon las luvyas, kale azer en kaza vente puntos de movimyentos, o demanyana o la noche. No, por sedaka no vos arrepintesh.  

Este anyo pensaremos i mos kreeremos veramente de aryento muestros korasones ke va aver pas en el mundo, ke la umanidad no va pensar mas a lo negro i va penar para ke el mundo se aga mas ermozo de dia en dia.

Para empesar, bushkaremos imediatamente un amigo ke pensa ke mos olvidimos de el.

Purifikaremos muestros meoyos, de las entisyones negras i del selo.

Estaremos mas delikados kon muestro entorno i mas finos.

Azeremos komplimentos a las personas para ke seygan orozos.

Mos olvidaremos de las indjustisyas ke mos izyeron.

Sintiremos mas muncho i estaremos atantivos.

Kuando estamos indjustos, no mos absteneremos de ekskuzarmos.

Daremos emportansa a las ideas diferentes ke no son las muestras.

Kuando mos atristamos o mos inyervamos, mos demandaremos: Este problem va ser tan emportante despues de dos semanas?

Kuando tenemos menester de koraje, mos azeremos sugjestiones.

No mos olvidaremos de sonreir mas muncho.

Teneremos mas muncha tolerensya.

No es fasil de azer esto todo ma kale empesar kon kreensya.

I lo ke es provechoso de lo ke akomplimos este anyo, formara  una eskalera para el anyo venidero. No kale arrepentir de las desizyones ke tomimos.

Una anyada mueva, es un avenir muevo. I la vida va pasar ansi, kon muevos dezeos, iluzyones,  emosyones i ideas...

Agora ke mos aserkimos de la semana de Rosh Ashana, ke es una de las fyestas  mas emportantes i el dia de arrogar al Dyo, en sintyendo el Shofar orasyonaremos por el anyo muevo, la sanedad, la felisita i por la pas i amor en el mundo entero sin la “Corona”, sin sar i sin mal.

Los djudyos toman muevas desizyones, se esforsan a purifikarsen de sus manyas i tyenen la kreensya ke van a estar pardonados de sus pekados de la parte del Todo Poderozo.

Todos los aravyados kale ke se agan pas, ke se rekonsilyen antes de Rosh Ashana para entrar sin pekados al anyo muevo.

Todas las promesas  son ovligadas de realizarsen para ser una persona mas umilde i para ser mas fruktuozos para la umanidad.

Estaremos todos eskritos en los livros santos...

Eskritas buenas i el Dyo ke mos guadre de las kozas ke no mos puedemos guadrar...

Siz de yorumunuzu yapın

Tüm Yorumları Görün