Un Milagro de Rosh Ashana

Metin DELEVİ Judeo-Espanyol
17 Eylül 2021 Cuma

Kopenhag, Danimarka… 78 anyos antes, Oktubre de 1943.

En la primavera de 1943, el puevlo de Danimarka entansifiko su rezistensya a la okupasyon Almana. Se entansifikaron las greves de los lavorantes i los aktos de sabotaj. El 28 de Agosto de 1943, el komandante militar alman en Danimarka deklaro el estado de emerjensiya i ordeno al governo de Danimarka de meter en vida la ley marsyal. El governo, ke akel tyempo era kontra los Nazis, no lo aksepto i demisyono.

El komandante jeneral de la okupasyon Nazi, Werner Best, vido esto komo una oportunidad para empesar la deportasyon de los djudios de Danimarka. Georg Ferdinand Duckwitz, un fonksyonaryo alman lavorando en Danimarka, infiltro la notisya ofisyal ma no deklarado dainda la deportasyon iminente a los lideres danezos, i eyos informaron de vista la komunidad djudia.

El 29 de Septembre de 1943, Erev de Rosh Ashana, el rabino prensipal de Danimarka entro en la Gran Sinagoga de Kopenhag, anunsyo los planes para la deportasyon i les disho a los yahidim de la asistensya ke se vaygan imediyatamente a toparsen kon sus famiyas i eskondirsen ande pueden.

Los arestos estavan programados para empesar el 2 de Octubre, ma komo vamos a ver no reusheron. La djente de Danimarka, myembros de la rezistensya, lideres de la eglizya, estudiantes, myembros de la polisiya, doktores, simple sivdadinos, se adjuntaron spontaneamente para impedir la operasyon de deportasyones. Preben Munch Nielsen, un estudiante de lise de Snekkersten, un kazal de peshkadores al norte de Kopenhag, estava entre los ke partisiparon a esta operasyon de salvasyon. Preben aviya partisipado a la rezistensya komo mesajero, en 1940, i se izo voluntaryo en la operasyon de salvasyon. Un polis, myembro de la rezistensya, vino a su kaza i le demando de arrekojer lo mas muncho de Djudios ke puede en una istasyon de treno serkana i de yevarlos, al bodre de mar pasando aryento de la shara. I de aya ivan a ser tomados kon barkas asta la Sueza. Preben eskapo esta misyon kon reushita i se unyo a los “Amigos del sonido”, un grupo de danezos kon baza en Snekkersten ke koordinavan los  pasajes sekretos a la Sueza. La Sueza, pais neutral, aksepto a los djudíos ke fuiyan de Danimarka i enkorajo a sus sivdadinos a darles la bienvenida.

Los "Amigos del sonido" empleyaron el “Snekkersten Inn” komo sus sentros de operasyones. Munchos djudios se eskondyeron en esta pozada o en kazas serkanas antes de ser yevados a los barkos ke asperavan en el bodre de la mar. Preben i sus amigos lavoraron endjuntos kon los peshkadores lokales para yevar asta dodje djudios a la vez en una barka para pasar la mar de 6-7 kilometros ke separava Danimarka i la Sueza. En mas poko de un mez, transportaron kaji 1.000 djudios a la Sueza.

Bushkado por la Gestapo, Preben se fuyo a la Sueza en Novembre de 1943. Torno a su kaza en Danimarka, kuando la gerra se eskapo en Mayo de 1945. Uno de los barkos de salvasyon empleyados por el grupo "Friends of the Sound" esta en egzibisyon en los Estados Unidos en el Muzeo USHMM.

Preben Munch Nielsen muryo en Oktubre de 2002.

Mas ke “Milagro de Rosh Ashana” komo se puede yamar esta oja de la istorya djudiya?

Siz de yorumunuzu yapın

Tüm Yorumları Görün