Mueva teknika para kurar una grande depresion

Dora NİYEGO Judeo-Espanyol
3 Kasım 2021 Çarşamba

Oy, ay miliones de personas ke estan sufriendo de hazinuras neurolojikas komo depresion, parkinson, alzeimer, i otras. El meoyo es la mas difisil parte del puerpo ke se puede analizar.  Es muy difisil de entender kualo esta trublando el meoyo. Miliones de dolares se esta gastando en los Estados Unidos para topar remedio a estas hazinuras. La mas difisil kestion del hazino es, si la hazinura le va pasar kompletamente. Munchas vezes los neurolojistos no estan puediendo responder a esta kestion.
La kompanyiya israeliana Brainsway, ke enventa muevos enstrumentos medikos, envento una kaska ke esta embiyando ondas manyetikas a las partes hazinas del meoyo. Segun Brainsway, kon la rezonansa manyetika, estan puediendo suivar el puerpo umano kon kolores, i kon vizuales tridimensional, i ansi, estan puediendo analizar mezmo el meoyo. En embiyando sinyales a siertas rejiones del meoyo, esta enerjiya esta metiendo en orden los neurones, i esta mijorando la fonksion de las partes afektadas del meoyo. Oy, kon esta teknolojiya reusheron a kurar la depresion. Brainsway esta esperando ke esta kaska se va vender en muevos merkados, kuando van a reushir a kurar las otras hazinuras neurolojikas kon esta sistem.
Esta metod konosida komo ‘stimulasion manyetika transkraneal’ va ser una version mas segura, i mas presiza ke la terapiya de elekroshok, i se va pueder empleyar por munchos anyos.
Segun Brainsway, esta teknolojiya es unika, porke esta puediendo entrar en mas profondo a las partes del meoyo ke no fueron alkansadas fin oy.
La Administrasion Federal de Kuras aksepto ke esta kaska se puede empleyar por kurar los hazinos kon una grande depresion. Brainsway esta kontinuando a azer eksperimentos por kurar las otras hazinuras neurolojikas.
El direktor tekniko de Brainsway disho ke el esta optimisto por un estudio ke se esta realizando en la Universdidad de Harvard, para kurar la epilepsia.

Rogamos ke se topen remedios porke de dia en dia mas munchas personas estan sufriendo de estas hazinuras neurolojikas. 

 

Siz de yorumunuzu yapın

Tüm Yorumları Görün